Жұмысшы мамандықтар жылы: ҚМГ тобында өндірісте 43 мыңнан астам адам еңбек етеді

«ҚазМұнайГаз» ҰК АҚ ел экономикасындағы стратегиялық маңызын және өз қызметін жүргізетін өңірлердегі әлеуметтік рөлін ескере отырып, өз қызметкерлерінің кәсіби дамуына ерекше назар аударады. Бүгінгі таңда ҚазМұнайГаз компаниялар тобында өндірісте 43 мыңнан астам адам жұмысшы мамандықтар бойынша еңбек етеді. Атап айтқанда, мұнай және газ өндіру операторы, ұңғымаларды зерттеу операторы, қабат қысымын реттеуші оператор, технологиялық қондырғылар операторы, бұрғылау қондырғыларына қызмет көрсету және газ жабдықтарын пайдалану және жөндеу жөніндегі слесарлар, токарь, электр-газ дәнекерлеуші, технологиялық сорғылар машинисі, матрос және т.б.

ҚМГ өндірістегі жұмысшыларға жайлы әлеуметтік-тұрмыстық жағдайлар жасау және өндірістік қауіпсіздікті қамтамасыз етумен қатар кәсіптік оқыту, біліктілікті арттыру, тағылымдамаларға жіберу және тәжірибе алмасуға ерекше назар аударады.

ҚМГ-да еңбекті насихаттауға және жұмысшы кәсіптерінің беделін арттыруға бағытталған негізгі іс-шаралардың бірі — «Үздік маман» шеберлік байқауы. Мамандар арасында жыл сайынғы кәсіби жарыс он жылдан астам уақыт бойы өткізіліп келеді.

Өткен жылы байқауға Атырау, Маңғыстау, Қызылорда, Ақтөбе және Павлодар облыстарынан, Шымкент қаласынан, сондай-ақ Румыниядан ҚазМұнайГаз еншілес кәсіпорындарының 300 қызметкері қатысты.