Жұмысшылар денсаулығы – компания назарында

«Біздің клиника жеке қызмет көрсету бойынша қаладағы үздік медициналық мекемелердің бірі. Бұған дейін де мұнай компанияларымен серіктестікте жұмыс істеп келеміз. Олардың денсаулығы жолында 30-ға тарта мамандық бойынша 270 ақ халатты қызмет етуге дайын», – деп атап өтті өндірістік медицина бойынша бас дәрігердің орынбасары Қарлығаш Құдайбергенова.

Компания жұмысшылары көпсалалы клиникаға келіп, тексерілуді бастап кетті. Солардың бірі кен орнындағы пайдалану, жабдықтау, икемдеу, жөндеу цехының инженері Бекзат Жайлаубаев. Медицина мамандары оны тексеріп, «екі жақты гайморит» диагнозын қойды.

«Бүгіннен бастап ем-дом қабылдап бастап жатырмын. Тез жазылып кетемін деген ойдамын. «Нейрон» қызметкерлеріне, дәрігерлеріне үлкен рақмет. Қолдан келген көмектерін жасап жатыр», – деді Бекзат Жайлаубаев.

Айта кететін жайт, былтырдан бастап штаттық қызметкерлермен қатар аутcтаффинг бойынша «Industrial Service Resources» ЖШС жұмысшылары да дәрігерлер көмегіне тегін жүгіне алады.

«Денсаулығыма ешқандай шағымым болмаса да, жұмыс ауысымынан келген сайын толық тексеруден өтіп тұрамын. Бізді бірінші рет «Нейрон» клиникасына қосып жатыр. Өзімнен бөлек, отбасымнан екі адамды емдеуге болатынын естіп, қуанып қалдым. Терапевт дәрігер тексеріп, емдік массаж жазып берді. Қаражанбас басшыларына рақмет айтамын», – деп қабат қысымын ұстау цехінің операторы Жәнібек Мамай ризашылығын білдірді.

Денсаулығына алаңдаған кез келген мұнайшыны «Нейрон» көпсалалы медициналық орталығы қабылдауға толық дайын. Жоспарлы тексеруден бөлек дәрігер бекіткен барлық ем дом тегін, бастысы сапалы жүргізіледі. Себебі Қаражанбас үшін қызметкер денсаулығы – басты құндылықтың бірі.