Хотите получать уведомления в браузере о последних изменениях на сайте SKNEWS.kz
Мұнай саласында ерлермен иық теңестіріп, ісіне адал, абыройы биік, қажырлы әрі нәзік әйел адамдар да қызмет етеді. Қаражанбаста игеру басталған жылдары қызметтің қиындығына қарамастан көптеген қыз-келіншек өндіріс өміріне араласты. Солардың бірі – №1 мұнай өндіру цехының техник-геологы Айман Қостанбекова. Батыл да байсалды маман ғұмырының 33 жылын вахталық әдіспен жұмыс істеуге арнап келеді.
Мұнайшылар – бұл ең алдымен инноваторлар мен зерттеушілер, миына мың идея жинаған ерекше жандар. Кейіпкеріміз де жастықтың жалынымен кен орнындағы қызметке келді. Ол 1989 жылы техникумды бітіргеннен кейін ғылыми-зерттеу өндірістік жұмыстар цехына өлшеуші болып жіберілді. Аға буын әріптестер жас маманға қызметінің қыр-сырын тез түсінуге көмектесті. Көп ұзамай Айман мамандық таңдауда қателеспегенін түсініп, тәжірибесін толықтырған соң мұнай өндіру цехының техник-геологы болды.
«Қысыммен, газдармен және өнеркәсіптік сұйықтықтармен жұмыс істеу өте маңызды. 80-90-шы жылдары біз сынамаларды банкаларға қолмен жинап, әр ұңғыманы айналып өттік. Қазір бәрі автоматтандырылған. Біз операторлар әкелетін тәуліктік есептерді базаға тіркейміз», – дейді Айман Қостанбекова.
Әр адамның естелігі құндылыққа толы. Ардагерлер салған сара жол жас мұнайшыларды биік белестерге жетелейді. Кейіпкеріміз жас буынға бұрынғы қиын да қызықты естеліктері мен жүріп-тұру үшін техниканың, жабдықтың, қарапайым көліктің болмағаны туралы жиі айтып отырады.
«Қаражанбас – табиғи байлықпен ғана емес, адамдардың әсерлі әңгімелері, естеліктерімен де бай. Өз мамандығыңызды бағалап, сүю аса маңызды», – деп қорытындылады техник-геолог.
Айман Қостанбекова кәсіби қызметімен қатар, отбасының қамын жасауға үлгеріп жүрген үлгілі жан. 4 баланың анасы перзенттерінің бойына ең жақсы адами қасиеттерді сіңіруге және таңдаған мамандығына адал болуды үйретуге тырысып келеді.