«Ішкі сенім бізді алдамады». Ардагер мұнайшының естелігі

«Қаражанбасмұнай» АҚ-ның қалыптасуы мен өркендеуі өмір жолын өндіріспен өрген ардагерлердің көз алдында өрбіді. Кен орнында қалтқысыз қызмет еткен мұнайшылар арқасында жазық далада басталған игеру жұмыстары жеміс беріп, оң нәтиже көрсетті.

Бүгінде зейнеткерлік демалыстағы Рахметолла Мырзабай өмірінің 30 жылдан астам уақытын Қаражанбасқа арнады. Білмегенін үйреніп, білгенін бөлісуден жалықпайтын ардагер кен орнындағы қилы кезеңдерді үнемі еске алып отырады.

«Кен орнына мұнай өндірудің алғашқы жылдарында келгендіктен талай қиындықпен бетпе-бет кездестік. Жергілікті жұмысшылар игерудің қыр-сырын, әдістерін аз білді. Жабдықтар мен техника тапшылығы тағы бар. Кен орнын жаяу жүріп өткен жылдар әлі жадымда. Бірақ мұның бәрі уақытша кедергі екенін ұғынып, Қаражанбастың нұрлы болашағына сендік. Ішкі сенім бізді алдамады», – дейді Рахметолла Мырзабай.

Ардагер қара алтын өндіру саласына сүбелі үлес қоса жүріп, асыл жарымен бірге 4 бала тәрбиелеп өсірді. Қазір қос ұлы әке жолын жалғап, Қаражанбас мұнайының игерілуіне атсалысып келеді. Рахметолла мұнайшы ұлдарына қазір Қаражанбаста өнімді еңбек етуге зор мүмкіндік бар екенін айтып, тек жұмыс істеуден жалықпау керектігін үнемі ескертіп отырады.

«Қаражанбас үшін қиын кезеңде жалақысыз да жұмыс істедік. Тамақ пен мүлікті талон арқылы алған сәттер әлі есімде. Қазір рахат қой. Жатын орын, дәмі тіл үйіретін тағамдар, әр цехте бірнеше көлік, әлеуметтік-тұрмыстық жағдай өте жақсы. Тек осыны бағалай білу керек!», – дейді ардагер.

Қаражанбаста қанат қатайтқан Рахметолла Мырзабай үш жылдан бері зейнет демалысында. Ұл-қызынан тараған ұрпағын қызықтаған ата, еңбектің көпке жеткізетінін немерелерінің санасына ерте жастан сіңіріп келеді. Қаражанбастың оң өзгерістері мен соңғы жаңалықтарын қалт жібермейтін ардагер ҚБМ-ның алдағы уақытта да биік белестерді бағындыратынына сенімді.