Кәсіподаққа білікті мамандар қажет

Бүгін Астанада "Медиация мен еңбек дауларын басқару" тақырыбында Кәсіподақ көшбасшылығы мектебінің төртінші модулі басталды. Бұл мәселеге қатысты кәсіподақ ұйымдары жетекшілеріне жанжалтану саласының белгілі сарапшысы Бақытжан Тәжібай дәріс оқуда.

Кәсіподақ қызметкерлерінің жаңа сипатын қалыптастыру мақсатында Қазақстанда алғаш рет қолға алынған кешенді білім беру жобасының мақсаты - еңбек ұжымдарындағы оңтайлы қарым-қатынастың қазіргі заманғы тәсілдеріне үйрету. Оның барысында кәсіподақтық менеджмент, әлеуметтік-еңбек қатынастарын реттеу, коммуникация, қаржы және заңи сауаттылық, қызметкерлерді басқару, дау-дамайларды шешу саласындағы өзекті мәселелер талданады.

Бақытжан Тәжібай - "Қазақстандық денсаулық сақтау қызметкерлерінің салалық кәсіптік одағы" қоғамдық бірлестігі төрағасының орынбасары. Конфликтология магистрі.

"Алғашқы құрылған жылдары көп жайттарды сот арқылы шешетінбіз. 2016 жылы енгізілген Еңбек кодексінің жаңа нұсқасында кәсіподақ пен жұмыс берушінің арасындағы әрекетін біріздендіріп жолға қойды деуге болады. Жаңа талапқа сай, 700 адамды оқытып, оның ішінде кәсіби медиаторларды дайындадық. Кәсіподақ қызметіне білікті мамандардың келгені жұмысты алға жылжытар еді. Бүгінде республика көлемінде алғанда кәсіподақ саласында білім алғандар өте аз. Менің өзім Мәскеудегі Еңбек академиясында оқыдым, Санкт-Петербургте кәсіподақтың гуманитарлық институтының үш жылдық магистратурасын үздік бітірдім", - дейді дәріскер осыған дейін "Астана ақшамы" газетіне берген сұхбатында.

Дәріске қатысушылар да шараның мазмұнды әрі қызықты ойластырылғанын атап өтуде.