Главная Новости Қандыағаштық теміржолшылар «Қаңтар оқиғасы» кезінде 300-дей жолаушыға қарайласты

01 ақпан 2022, 11:30 1214

Қандыағаштық теміржолшылар «Қаңтар оқиғасы» кезінде 300-дей жолаушыға қарайласты

Қандыағаш станциясы мен вокзал ұжымы «қаңтар оқиғасы» кезінде 34 сағат кідірген жолаушылар пойызындағы 300-ге жуық адамға тік тұрып қызмет көрсетті. Сол түндегі оқиғаны вокзал басшысы Жанна Иманова айтып берді.

«Қандыағаш станциясында тұрып қалған №38 Семей-Маңғыстау пойызының жолаушыларына қолдан келген барлық көмекті ұйымдастырдық. Вокзалдың бірінші қабатында «Мейірімді жүрек жылуы» қайырымдылық қорының ұйымдастыруымен ыстық тамақ берілді. Станция жұмысшылары күндізгі ауысымда 12 адам, түнгі ауысымда 5 адам қосымша көмекке келіп, жолаушыларға ыстық шәй, ас-су беріп, балаларға жаялық, сусын, сүт таратты», – дейді Жанна Иманова.

Айта кетейік, елде тіркелген төтенше жағдайға байланысты 5 қаңтар күндері Қандыағаш станциясына №37/38 жолаушы пойызы тоқтаған. Ішінде 275 жолаушысы бар 12 вагондық жолаушылар пойызының бастығы Қуатжан Исмағұлов қандыағаштық қонақжай теміржолшыларға жолаушылар атынан алғысын айтты.

Пойыз жолаушыларына Қандыағаш станциясының жеке кәсіпкерлері де азық-түлік таратуға көмектескен. Ыстық тамақ пен қажетті бұйымдар вагондарда да үлестірілген. Аудан әкімдігі жағдайды бақылауда ұстау және ұйымдастыру жұмыстарына көмектессе, желілік полиция қызметкерлері мен көлік прокуратурасы қауіпсіздік жайын қолға алыпты.

«Жалғыз біз емес, бүкіл қала бір кісідей көмек жасады. Әсіресе пойыз тоқтап тұрған кезде вагондарды көмірмен қамтамасыз еткен жеке кәсіпкер Азамат Ертаевқа рахмет. Бір жарым тәулік бойы жолаушылардың тоңбауына жағдай жасады», – дейді вокзал басшысы.

Ардақ Ерубаева

Дереккөз: "Қазақстан теміржолшысы"

Еще больше новостей на нашем telegram-канале , подписывайся и будь в курсе!

К списку статей Следующая статья

АРХИВ ЖУРНАЛОВ SKNEWS