Қаражанбас жұмысшылары мұнай да өндіреді, бау-бақша да өсіреді

«Қаражанбамұнай» АҚ жұмысшылары бірнеше жыл қатарынан кен орнында түрлі жемістер өсіріп, өздері еккен көкөністер мен жемістерден дәм татып жүр. Қоршаған ортаға ұқыппен қарауды басты назарда ұстайтын мұнайшылар жұмыстан тыс уақытта цехтар мен жатақханалар маңын жасыл желекке айналдырған.

Технологиялық көлік департаменті №2 өндірістік басқармасының жұмысшылары тұратын №4 жатақханаға қарасты 7 блоктың ауласын нағыз «Үлгілі аула» деп атауға болады. Машинист Орынбасар Алтыназаров ұйымшыл әріптесімен бірге көктемде ауланы абаттандырып, әрлеу жұмыстарын жүргізді. Одан соң түрлі гүлдер отырғызып, қызанақ, қияр, баялды, қарбыз, қауын сияқты көкөністер мен жеміс ағаштарын еккен. Әріптестердің игі ісін келесі вахтаның арнайы техника жүргізушілері де қолдап, егінді арамшөптен тазартып, уақытылы суарып отырды. Жігіттер бірлескен бастамадан оң нәтиже көргеніне бек қуанышты.

«Қаражанбас біздің берекелі еңбек ордамыз десек, жатақхана өміріміздің жартысы өтетін ыстық ұямыз. Мұнда біз бір үйдің баласындай нағыз бауырға айналдық. Өндірісте жұмыстың жеңілі жоқ. Кейде шаршап тұрсақ та, жасыл желекке күтім жасауды әдетке айналдырдық. Есік алдына шықсақ әдемі көрініс көңілімізді көтеріп, сол арқылы жұмысқа құлшыныс артады»,- дейді жұмысшылар.

Қазыналы мекенде тек мұнай өндіріп қана қоймай, өсірген бау-бақшадан жеміс алуға болатынын қаражанбастықтар әлдеқашан дәлелдеп қойған. Мысалы ғылыми зерттеу және өндірістік жұмыстар цехының қызметкерлері бірнеше жыл қатарынан көкөніс түрлері мен алма, алмұрт, жүзім, шие және өрік ағаштарын отырғызып, күтім жасап келеді. Осылайша цех ұжымы жаз бен күз айларында ортақ еңбектің жемісін жейді. Көңіл қуантарлығы, Қаражанбас кен орнында мұндай мысалдар жеткілікті. Еңбек адамдары өндірістегі жетістіктерімен қатар осындай бастамалары арқылы да көпке үлгі десек артық емес.