Қаражанбас мұнайшылары қысқа дайын

Қаражанбас кен орнында өткен «Қыс-2021» республикалық командалық-штабтық оқу-жаттығуы аясында жеке құрам мен арнайы техникалар толық тексеруден өтті.

Мұнай өндіру кен орындары төтенше жағдайлар пайда болу қаупі жоғары аймақтар қатарына жатады. Әсіресе қыс мезгілінде қауіп еселене түседі. Қауіпсіздіктің сақталуы – жедел бөлімшелердің дайындығына, олардың өзара байланысы және материалдық-техникалық базаның жабдықталуын толық бақылауға байланысты.

Тактикалық жаттығуларды өткізу үшін ҚБМ-ның азаматтық қорғаныс құрылымдарының 40-тан астам техникасы мен 100-ден астам адам жұмылдырылды. Хабарлау жүйесі мен күнтізбелік жоспар бойынша жиналудың нормативтік уақыты, азаматтық қорғаныс күштері мен құралдары тексерілді. Апаттарды жою жоспары, жаттығулар өткізу журналы, сондай-ақ мердігерлік ұйымдардың дайындығы қадағаланды.

«Қыс мезгілінде төтенше жағдайға қарсы тұру оңай емес екені белгілі. Өтіп жатқан оқу-жаттығу аясында азаматтық қорғаныс құрылымдарының дайындығы пысықталып, техника мен құралдардың жеткілікті екеніне көзіміз жетті. Қыс мезгіліне сақадай саймыз», – деді ҚБМ басшылығы.

Оқу-жаттығу кен орнының жедел қызметтерінің қыс кезіндегі төтенше жағдайлармен күресуге және алдын алуға дайын екенін көрсетті. Қойылған міндеттер жоспарға сай орындалды.