Қаражанбас мұнайшысы – екі дүркін ел чемпионы

Түркістан облысында өткен жарысқа Қазақстанның түкпір-түкпірінен жүзден астам спортшы қатысқан. Тиегіш көлік жүргізушісі Айдын Ахметов 95 келі салмақ дәрежесінде бақ сынап, қарсыластарынан басым түсті. Осылайша ол екі дүркін ел чемпионы атанды.

Спортшының жетістігі – әріптесі әрі жаттықтырушысының да еңбегі. Нартай Алтыбаев № 3 мұнай өндіру цехында оператор болып жұмыс істейді. Демалыс кезінде ол спортшыларды жарыстарға дайындап, жеңіске жетелейді. Бұл жолы да оның чемпионатқа қатысқан 10 шәкірті жүлделі орындармен оралды.

«Өткен айда мен кір тасын көтеруден ел чемпионы атандым. Бір айдан кейін нәтижемді жаңартып отырмын. Мұның бәрі жаттықтырушымның жаттығуларды күшейтіп, оң жол нұсқауының арқасы деп білемін. Қолдау көрсеткені үшін әріптестеріме алғыс айтамын», – деді чемпион Айдын Ахметов.

Өндірістегі ауыр жұмысын аталмыш спорт түрімен қатар алып жүрген қаражанбастықтар бүгінде Азия чемпионатына дайындықты бастады.