Қаражанбасқа 35 жылын арнаған маман

Ол алғаш рет осыдан 35 жыл бұрын кен орнына қадам басып, еңбекке араласқан. Өндірісте алдымен өлшеуші, кейін диспетчер, химиялық су тазарту аппаратшысы, кітапханашы болып жұмыс істеген.

Балбибіні көбісі кітапханашы ретінде жақсы таниды. Себебі ол Қаражанбас кітапханасы өз алдына дербес жұмыс істеп бастаған жылдары аталмыш қызметтті алғашқы болып атқарған.

«Мен өз ісіне асқан сүйіспеншілікпен кірісетін адаммын. Қаражанбасты сондай жақсы көремін. Мұндағы әрбір ұжымдасым туысымдай ыстық. Кен орнында көптеген жұмыстарды жауапкершілікпен атқардым. Қызметті қиын, оңай деп бөлген емеспін. Еңбек еткен адам барлығына қол жеткізеді», – дейді ол.

Балбибі қазір Компанияның орталық кеңсесінде құжаттанушы болып жұмыс істейді. ҚБМ-ның әрбір кіріс және шығыс құжаттарын байыппен бақылап, ұқыпты қарайды. Кен орнында да, кеңседе де жұмыс істеп көрген ол, маман ретінде шыңдаған Қаражанбасқа дән риза.

«Өмірімнің 35 жылын мұнай саласына арнадым. Сол себепті Қаражанбас менің өмір кітабымдағы ең үлкен әрі маңызды тарау. Ғұмырымның осы салада, осындай ұжыммен өтіп жатқанына қуаныштымын. Қаражанбас тек жұмыс орны емес, нағыз өмірге тәрбиелейтін теңдессіз мектеп», – дейді Балбибі Қайлыбаева.

Қаражанбаста ғұмырын өндіріспен өрген үлгілі маман көп. Жас буын үлкендер салған сара жолмен жүріп, олардың өнегелі ісінен ғибрат алады. Бұл ұрпақтар сабақтастығын сақтаған ұйымшыл ұжымның болашағы жарқын екендігінің айқын кепілі.