«Қаражанбасмұнай» ардагері: Бізде мықты ұжымдық рух пен бірлік болды

«30 жыл ішінде біз көптеген қызықты күндерді бастан кештік, қиын шақтарды да еңсердік. Қыстың суығы мен жаздың аптабында, қою балшыққа қарамастан кен орнын жаяу аралап, ұңғыма дебиттерін өлшеп, мәліметтер жинадық. Заманауи технологиясыз, арнайы киім мен автокөліксіз де нәтижелі жұмыс істедік. Кәдімгі шыны банкалармен шай ішкеніміз есімде. Алайда, ең бастысы, бізде мықты ұжымдық рух пен бірлік болды. Мен сүйікті кен орнымыздың қазіргі жетістіктерін көріп, қатты қуанамын. Жыл сайын жаңа технологиялар енгізіліп, жұмысшылардың еңбек жағдайы жақсаруда. Қаражанбас жаңа белестерді бағындырып, қарыштап дами берсін!», – дейді ардагер.

Жұмагүл Байтілеуованың айтуынша, олардың басты мақсаты сол жылдары өндіріс көлемін арттыру болды. Мақсатқа жету жолында автокөлік, арнайы киім және жеке қорғаныс құралдарының жетіспеушілігі кедергі болмаған. Ардагер қазір мүмкіндіктердің мол екенін көріп еңбегінің еш кетпегеніне қуанады.

Дереккөз: «Қаражанбасмұнай» АҚ баспасөз қызметі