«Қаражанбасмұнай» биыл 2,1 млн тонна мұнай мен битум сатуды көздейді

Бас директордың экономика және қаржы жөніндегі орынбасары Мырза Серіков қаржы-экономикалық қызметі туралы баяндама жасады. Ақпаратқа сәйкес, ағымдағы жылы үш бағыт бойынша мұнай мен битумды сату болжамы шамамен 2,1 млн тоннаны құрайды. Бұл ретте, 2022 жылға бекітілген таза пайда жоспар бойынша 31 млрд теңгені құрады, алайда бірқатар факторлар 2022 жылғы болжамға таза пайданы 18 млрд теңгеге дейін азайту жағына түзетулер енгізді.

Атап айтсақ, геосаяси тұрақсыздық Urals және Brent маркалы мұнай бағалары арасындағы жеңілдікке әсер етті. Оған қоса, 2022 жыл болжамына экспорттық операцияларға салық салу ерекшеліктері кері әсерін тигізіп отыр. Яғни рента салығы мен ПҚӨС салу Brent маркалы мұнай бағасы бойынша жүзеге асырылады. Сондай-ақ, ҚБМ-ның қарыздарды өтеу бойынша міндеттемелері бар екенін атап өткен жөн. Аталған факторларға байланысты ағымдағы жылдың қараша-желтоқсан айларында кассалық алшақтық туындауы ғажап емес.

Осыған орай, компания Urals маркалы мұнайдың сорты бойынша салықтарды есептеу үшін KAZENERGY-мен бірлесе отырып, салық кодексіне түзетулер енгізуге бастамашылық жасау және кассалық алшақтықты болдырмау үшін қосымша қарыздар тарту сияқты бірқатар шаралар қабылдауда.

Қаржылық жағдай туралы баяндамадан кейін технологиялық көлік басқармасына алғашқы үш арнайы техниканың кілтін салтанатты түрде табыстау рәсімі өтті. Автопаркті жаңартуды жүзеге асыру – аталмыш басқарма үшін көптен күткен оқиға. Атап айтсақ, ТКБ-да қызметкерлерді кен орнында тасымалдауға арналған екі жаңа автобус және заманауи автогидрокөтергіш қызметке кіріседі.

«Біз интеграциядан кейін құрылған екі басқармаға ерекше назар аударып келеміз. Көлікті басқармасында оң өзгерістер басталды. Жаңа техниканы табыстау - бұл бүкіл көлік жүйесін жаңғырту жолындағы алғашқы қадамдардың бірі. Алда әлі де ауқымды жұмыс күтіп тұр. Жаңа арнайы техника жұмыс өнімділігін арттырып, компания дамуына серпін беретініне сенімдіміз», – деді ҚБМ Басқармасы.

Салтанатты шараға қатысушылар жаңа арнайы техниканы қабылдап, ТКБ-ын жаңғырту бойынша ауқымды жұмыстар жалғасатынына сенім білдірді. Айта кету керек, автопарк жақын арада тағы бірқатар заманауи арнайы техникамен толықтырылады.

«Мен көп жылдан бері Қаражанбастың көлік саласында жұмыс істеймін және бүгін өте қуаныштымын. Себебі, ескі техника жиі бұзылады, ол жұмысқа кедергі келтіреді. Ал жаңа көлікпен жұмыс жандана түседі. Біздің ұсыныстарымызға жедел жауап бергені үшін басшылыққа рахмет», – деді көлік қызметкерлері.

Жұмыс ауысымы аяқталғаннан кейін, Қадір түні қарсаңында ауызашар-садақа ұйымдастырылды. Ораза ұстаған мұнайшылар өндірістегі төтенше жағдайлардың алдын алу және жазатайым оқиғалардан сақтасын деген ниетте дұға оқыды.