Қаражанбасмұнай І вахта үздіктерін анықтады

Қаражанбаста І вахта жұмысшылары арасында өткен «ҚазМұнайГаз» ҰК» АҚ спартакиадасының іріктеу кезеңі өз мәресіне жетті. Сайыстар ең алдымен мұнайшылардың ұжымдық рухын нығайтып, жеңіске жетуге ерекше жігер берді. Жүзден астам қатысушы арқан тарту, қол күрес, тоғызқұмалақ, шахмат, асық ату және үстел теннисінен тартысты ойын көрсетіп, қатарынан оза шапқандар есімі белгілі болды.

Қол күрестен 80 келіге дейін өнер көрсеткен №2 Ұңғымаларды жерасты күрделі жөндеу цехының (ҰЖКЖЦ) бұрғышы көмекшісі Жұмат Сағындықов пен 80+ келі салмақ дәрежесінде бақ сынаған бу өндіру цехының химиялық су тазарту аппаратшысы Мұса Сүлейменов І орын иеленді. Тоғызқұмалақ жарысында БӨЦ машинисі Бекберген Ақниязов үздік атанса, өндірісті автоматтандыру цехы командасы арқан тартудан алдына жан салмады.

Тартысты бәсекенің бірі ұлттық ойын – асық ату сайысы болды. Мұнда №1 мұнай өндіру цехы командасы қырағылық танытып, жеңіске жетті. Ал ой ұшқырлығы сыналатын шахмат жарысында ҰЖКЖЦ аға шебері Көшербай Ізбасаров І орын иеленді. Іріктеу жарыстары үстел теннисі сайысымен қорытындыланды. Бұл жарыста технологиялық көлік департаменті жұмысшысы Айтмохаммад Қазақ шашасына шаң жұқтырмай жеңіске жетті.

Айта кетейік, қос вахтаның жүзден жүйрік шыққан жеңімпаздары ҚМГ спартакиадасының келесі кезеңінде өңірдегі өзге мұнай компанияларының жұмысшыларымен сайысқа түседі.