Қаражанбасмұнай кәсіподағы көп балалы отбасына жаңа үй сыйлады

Гүлнар Тәжібаеваның тұңғышы 13, ал ең кіші перзенті 3 жаста. Олар бірнеше жылдан бері жалдамалы пәтерлерді паналап келген. Балалардың қажеттілігін қамтамасыз ету үшін келіншек көше тазалаушы болып жұмыс істейді. Гүлнар қыс жақындап, аязды мезгілді қалай өткізетініне алаңдап жүр еді. Енді ол жанашыр жандар сыйлаған жаңа үйге көшіп, қиындықтың бәрі артта қалғанына сене алар емес.

«Кең үйде тұру біз үшін қолжетпес арман көрінетін. Қаражанбас мұнайшыларына, оның ішінде кәсіподақ ұйымына қиын кезеңдегі орасан зор көмегі үшін алғыс айтамын. Енді менің балаларым жылы үйде, жайлы өмір сүреді. Мен олардың болашағы үшін еңбек ете берем», – деді Гүлнар Тәжібаева.

Жомарт жұмысшылар сыйлаған бес бөлмелі баспана жарық, жылы әрі кең. Үй қажетті инфрақұрылым және техникамен толық қамтамасыз етілген. Аулада төрт түлік ұстайтын қора, тұрмысқа қажетті сарай да салынған. Ең бастысы кең аулада Гүлнардың ұл-қыздары алаңсыз асыр салып ойнай алады.

«Мұқтаж жанға көмек беріп, үлкен іс бастау көптен жоспарда жүрген еді. Бүгін сол ойымыз іске асып, бір отбасын бақытқа бөлеп отырмыз. Кәсіподақ мүшелері, мейірімді мұнайшылар бастаманы қолдап, барлығы сәтті жүзеге асты. Игі іске ұйытқы болу біз үшін де зор қуаныш әрі мәртебе»,- деді «Бірлік» кәсіподағының төрағасы Қуаныш Сисенбаев.

Кәсіподақтың жанашыр мүшелері Гүлнарға үй сыйлап қана қоймай қажетті жабдықтар мен азық-түлік табыстады. Батыл және еңбекқор ананың қуанышында шек жоқ. Енді ол берекелі шаңырақта мерекелі күн кешетініне сенімді.