«Қаражанбасмұнай» кәсіподағының жаңа төрағасы сайланды

Алғаш боп сөз сөйлеген кәсіподақтың экс-төрағасы Айтбай Кужухов денсаулығына байланысты қызметін тоқтатып, өзіне сенім артқан ҚБМ басшылығы мен еңбек ұжымына бірлескен жемісті жұмыс үшін алғыс білдірді. Сондай-ақ ол есептік кезеңде Кәсіподақ қызметінің негізгі көрсеткіштері, материалдық төлемдерді қамтамасыз ету, демалыс пен емдеуді ұйымдастыру, Ұжымдық шарт аясында жұмысшылардың әлеуметтік-еңбек жағдайының жақсарғаны туралы айтты.

Одан соң конференция қатысушылары сайлауға кірісті. ҚБМ Кәсіподақ төрағасы лауазымына екі кандидат өтініш білдірді. Олар – мұнай дайындау және айдау цехының операторы Орынбек Сатыбалдиев және қауіпсіздік қызметі бөлімінің инспекторы Ахымет Қобыланов. Кандидаттар бір ай ішінде ұжым арасында үгіт-насихат жұмыстарын жүргізіп, қызметкерлермен кездесіп, сайлауалды бағдарламаларын таныстырды.

Сайлау барлық цехтар мен бөлімшелер өкілдерінің қатысуымен ашық дауыс беру форматында өтті. Айта кету керек, барлық электоралды процессті мандаттық комиссия бақылаушылары қадағалады.

Ашық сайлау нәтижесінде ҚБМ кәсіподақ төрағасы лауазымына Орынбек Сатыбалдиев сайланды. Енді оны қолданыстағы Ұжымдық шарт аясындағы жұмыстардың іске асырылуы және өз сайлауалды бағдарламасы тармақтарының орындалуы күтіп тұр. Дәл осындай тәртіппен Кәсіподақ комитеті мен бақылау-тексеру комиссиясының жаңа құрамының сайлауы өтті. Енді Кәсіподақтың жаңадан сайланған өкілдері жұмысшылар мүддесін қолдап, жұмыс беруші мен қызметкерлер арасындағы байланысты нығайтпақ.

Конференция қорытындысы бойынша ҚБМ Басқармасы Айтбай Кужуховтың ұжымға сіңірген зор еңбегін атап өтіп, құттықтау хатын табыстады. Сонымен қатар, мұнай-газ кешені салалық кәсіподағының төрағасы Сұлтан Қалиев А.Кужуховқа және кәсіподақ комитетінің мүшелеріне «Кәсіподақ ардагері» және «Салалық кәсіподаққа сіңірген еңбегі үшін» медальдарын табыс етті.