«Қаражанбасмұнайда» интеграция ресми жүзеге асты

Бүгіннен бастап «Тұлпар Мұнай Сервис» ЖШС, «Арғымақ Транс Сервис» ЖШС, «Технологиялық көлік және ұңғымаларға қызмет көрсету басқармасы» ЖШС біртұтас «Қаражанбасмұнай» АҚ болып біріктірілді.

ҚБМ интеграцияға асқан жауапкершілікпен қарады. Атап айтсақ, барлық қызметкер жұмыс орнын, жалақы деңгейін, еңбек шартының мерзімін, демалыс кестесін сақтап қалды. ҚБМ Директорлар кеңесі жаңа ұйымдық құрылымды бекітті. Екі жаңа қосымша басқарма құрылды, олар: технологиялық көлік басқармасы және бұрғылау, ұңғымаларды жерасты күрделі жөндеу басқармасы.

«Бүгін Қаражанбастың барлық қызметкері үшін тарихи маңызды күн. Біз өсу мен даму жолында салмақты қадам жасадық. Осындай өндірістік көрсеткіш мен ұйымшылдық арқасында болашақта ірі холдингке айнала аламыз. Сервистік мекемелерді бір компанияға біріктіру жұмысты оңтайландырады, өндірістік міндеттерді орындау тиімділігін арттырады, компаниялар арасындағы шарттық қатынастарды жояды. Біз бірыңғай жүйе бойынша біртұтас ұжымды дамытып, жаңа белестерге ұмтыламыз», – деді «Қаражанбасмұнай» АҚ Басқарма мүшелері.

Қаражанбастықтар олардың күші – бірлікте екеніне және бір шаңырақ астына бірігу - дамуға жаңа серпін беретініне, қызмет көрсету саласынан мұнай өндіруге көшуге ықпал ететініне, шығындарды азайтып, персоналды дамытудың бірыңғай жүйесін іске асыруға мүмкіндік беретініне сенімді. ҚБМ қызметкерлері үлкен жетістікке жете отырып, алдағы уақытта да биік белестерді бағындыруға дайын.