Қаражанбасмұнайда спорт сайысының үздіктері марапатталды

Өндірістік басқарма және әлеуметтік саясат департаментінің басшылығы жұмысшыларды еліміз үшін маңызды мерекемен құттықтап, жарыста оза шапқан жүлдегерлер мен жеңімпаздарды марапаттады.

7 спорт түрі бойынша жарыс бір аптаға жалғасты. Мұнда мұнайшылар жеке және командалық сайыстарда өз цехының абыройын қорғады. Мықты дайындық, ұжымдық рух, жанкүйерлер қолдауы... Жеңіс жолында жұмысшылар физикалық дайындығын дәлелдеп, чемпиондық атаққа лайық екенін дәлелдеді.

Қорытынды бойынша кір тасын көтеруден қабат қысымын ұстау цехының операторы Жеңіс Джалдасов І орынға ие болды. Шахматтан MSC мердігер мекемесінің жұмыс есебін жүргізуші Ғамзат Төребеков үздік атанды. Бильярд бойынша қабат қысымын ұстау цехының шебері Жәнібек Сұлтанғалиев жеңіс тұғырынан көрінді. Үстел тениисінен жөндеу-механикалық цехының шанақтарды рихтовкалаушысы Айтмохаммад Қазақ шашасына шаң жұқтырмады. Арқан тартудан өндірісті автоматтандыру цехының жігіттері, шағын футболдан қауіпсіздік қызметі құрамасы, волейболдан №1 мұнай өндіру цехының жігіттері чемпион болды.

Жүлдегерлер мен жеңімпаздарға диплом, кубок пен сыйлық сертификаттары табыс етілді. Сайыс ІІ вахта жұмысшылары арасында да ұйымдастырылады.