Қаражанбаста жаңа операторлық пункт пайдалануға берілді

Аталмыш нысан өндірістік процесті оңтайландырып, мұнайшылардың еңбек жағдайлары мен жұмыс сапасын арттыру, сондай-ақ бақылау және басқару жүйесінің тұрақтылығын сақтау мақсатында салынған. Салтанатты ашылу рәсіміне «Қаражанбасмұнай» АҚ Бас директоры Нұрсейіт Союнов, өндірістік басқарма және еңбек ұжымы қатысты.

«Заманауи жабдықталған операторлық пункттің ашылуы – біз үшін маңызды оқиға. Жаңа нысан жұмыс тобы үшін өте ыңғайлы. Кабинеттер жарық, кең. Жыл сайын оң өзгерістер арқасында жұмыс нәтижесі артып, процестер автоматтандырылып келеді. Жұмысшылардың еңбек жағдайын жақсартуға назар аударып, барлық қажетті жобаларды жүзеге асырып жатқан басшылыққа алғысымыз шексіз», – деді №1 МӨЦ жұмысшылары.

№1 МӨЦ қарамағында 1149 ұңғыма бар. Тәуліктік мұнай өндіру көлемі 2400 тоннаны құрайды. Мұнда 8 бригада жұмыс істейді. Айта кету керек, бұл учаскеде өндірістік процеске жаңа серпін беретін №37 топтық өлшеу қондырғысын салу жоспарлануда.