Қаражанбаста «Жас маман кеңесі» жоспары талқыланды

Кездесуде ІІ ауысымның вахтааралық демалыстағы жұмысшылары компанияның стратегиялық мақсаттарына сәйкес жастардың кәсіби және тұлғалық дамуына бағытталған бастамалар мен жобаларға қатысты ұсыныстар мен ой-пікірін ортаға салды.

ЖМК төрағасы Айбек Ұлықпанов былтыр атқарылған шараларға қысқаша шолу жасап, жас мамандардың белсенділігі үшін алғыс білдірді. Одан соң қатысушылар корпоративтік мәдениетті нығайту, кәсіби білім мен дағдыларды арттыру, көшбасшылық қасиеттерді дамыту тақырыптары бойынша іс-шаралар жоспарын пысықтады. Сондай-ақ білімді, жігерлі, заманауи, ойы ұшқыр жастар әріптестерді әлеуметтік және экологиялық бастамалар кезінде белсенді болуға шақырды.

ҚБМ жұмысшылары жыл сайын «ҚазМұнайГаз» ҰК» және «Самұрық Қазына» АҚ жас мамандары арасында өтетін түрлі бағыттағы сайыстар мен шығармашылық байқауларға қатысып, компания намысын абыроймен қорғап келеді. Қаражанбас жастары алдағы уақытта да өндірістік міндеттерді сапалы орындап, компаниядағы жастар саясатының дамуына сүбелі үлес қосуға ниетті.