Қаражанбастағы су тұшыту зауыты маусымда іске қосыла ма?

Жиналысқа «ҚазМұнайГаз» ҰК» АҚ, Маңғыстау облысы әкімдігінің өкілдері, ҚБМ Басқармасы, инвестор «Ситик Водная Экология (Ақтау)» ЖШС, сондай-ақ мердігер мекеме өкілдері қатысты. Кеңеске ҚМГ басқарма төрағасының орынбасары Құрманғазы Есқазиев бейнеконференция арқылы төрағалық етті.

Күн тәртібінде жобаны іске асырудың мәртебесі және құрылыс-монтаждау жұмыстарын орындау кестесі талқыланды. Кеңес барысында «СВЭ-А» Бас директоры Менг Чжаоцзин жұмыс барысының қарқын алғанын айтып, қатысушыларға биыл мамыр айының соңына қарай ҚМЖ аяқтау жоспарланғанын жеткізді. Сондай-ақ, ол маусым айының соңына қарай іске қосу жұмыстары жүргізіліп, тұщы су берудің басталатынын атап өтті.

Алайда, ҚБМ басқармасы инвестордың жұмысына қанағаттанбайтынын жеткізді. Жұмыстардың шикі ұйымдастырылуы, халықаралық тәжірибенің болмауы және бас мердігермен шешілмеген көптеген маңызды мәселелердің бар екендігі атап өтілді. Сондықтан, ҚБМ басқармасының пікірінше, жұмыстарды инвестор көрсеткен мерзімде аяқтау мүмкін емес. ҚБМ басшылығы жобаны іске асыру үшін ықпал ететін барлық дипломатиялық, құқықтық механизмдерді қолдануға дайын.

Өз кезегінде, облыс әкімінің орынбасары Бекбол Орынбасаров өңірді дамыту үшін ауыз су қажеттілігіне байланысты зауыт құрылысын жедел аяқтаудың маңыздылығын атап өтті. Ол инвестор тарапынан менеджменттің әлсіздігіне алаңдаушылық білдірді. Бұл мерзімнен кешігуіге және стратегиялық маңызды мәселелерді шешудің созылуына әкеледі. Жазда аймақтағы су тұтыну мөлшері едәуір артатынын ескеру қажет. Сондықтан шілде айынан бастап кен орнынан Еділ суының белгілі бір бөлігі халық қажеттілігіне бағытталады. Мұнай өндіру тікелей бу айдау әдісімен жүзеге асатын Қаражанбасқа су беруді шектеу өндірістік процестің және тұтастай алғанда компанияға әлеуметтік-экономикалық тұрғыда қиындық туғызады.

Көрсетілген кедергілерге жол бермеу және зауытты уақтылы іске қосуды қамтамасыз ету мақсатында жобаға қатысушы барлық тараптарды жандандыру, қалған құрал-жабдықтарды жеткізу жөніндегі мәселелерді тезірек шешу қажет. Айта кету керек, өңірді сумен қамтамасыз ету мәселесімен қатар, Қаражанбастағы су тұшыту зауыты жобасы Мемлекет басшысының ерекше назарында.

Кеңес қорытындысы бойынша, ҚМГ басқарма төрағасының орынбасары Құрманғазы Есқазиев инвестор мен жобаға қатысушыларға бір апта ішінде барлық мердігер ұйымдармен келісілген жұмыстарды орындаудың апта сайынғы есебін көрсете отырып, зауытты пайдалануға беру жөніндегі жол картасын ұсынуды тапсырды. Жол картасында ҚМЖ, ІҚЖ аяқтау уақыты, зауытты толық пайдалануға беру, тарифті келісу, мемлекеттік қабылдау, персоналды тарту және оқыту мерзімі көрсетілуі шарт. Сонымен қатар, құрылыстың толық аяқталу мерзімі мен өнімнің сапасына кепілдік берілу қажет.