Қаражанбастағы зауыт тәулігіне 17 мың текше метр су өндіре алады

Зауыттың негізгі объектілерінде Нұрлан Ноғаев кері осмос көмегімен көп сатылы сүзу және деминерализация әдісімен ілеспе қабат суын тұшытудың өндірістік процесімен танысты. Тазартылған техникалық су бу айдау әдісімен кен орны қабаттарының мұнай беруін арттыру үшін пайдалануға жарамды. Өңір басшысы зауыттың маңыздылығы мен келешегін атап өтіп, мамандардың жұмысын және кәсіпорынның өндірістік әлеуетін жоғары бағалады.

«Мен зауыттың құрылыс алаңында 2020 жылы, тек іргетасы қаланып тұрған кезде болдым. Ал қазіргі нәтижеге қарап, оның болашағы зор деп сеніммен айтуға болады. Бұл зауыт өңірдегі сумен қамту мәселесін шешудегі ірі жобалардың бірі. Стратегиялық маңызды өндіріс кен орнының өзін - өзі сумен қамтамасыз етуіне мүмкіндік беріп, облыс халқы үшін Астрахань-Маңғышлақ су құбырынан судың едәуір көлемін босатады. Мұнда заманауи технологиялар қолданылады және оқытудан өткен жоғары білікті мамандар тартылды. Технологияның күрделілігін ескере отырып, зауыттың іске қосылып, технологиялық талаптарға сәйкес жұмыс істеп тұрғаны қуантады», – деп атап өтті облыс әкімі Нұрлан Ноғаев.

Бұдан соң, инвестор, бас мердігер және зауыт персоналының қатысуымен өткен жиналыс барысында өңір басшысы процестердің үздіксіздігін қамтамасыз ете отырып, өндіріс көлемін біртіндеп арттыру бойынша жұмысты жандандыруды тапсырды. Ал ҚБМ Басқармасына мұнай өндіру көлемін төмендетпеуге нұсқау берілді. Мәселен, толық қуатқа шыққан кезде ілеспе қабат суын өңдеу тәулігіне 42,5 мың м³ құрайды. Бұл кезде тазартылған суды өндіру тәулігіне 17 мың м³ жетеді.

Өңір басшысы нысанның тек компания үшін ғана емес, жалпы өңір үшін де маңыздылығын атап өтті. Өнімділігі мен бірегейлігі бойынша Қазақстандағы ілеспе қабат суын тұшытатын бірінші зауыт сумен жабдықтау мәселелерін ғана емес, сонымен қатар өндіру көлемін арттыру, ұңғымаларды күрделі және жерасты жөндеу санын мен грифон түзілу көлемін азайту сияқты бірқатар технологиялық мәселелерді шешуге ықпал етеді.

Сонымен қатар, жұмыс делегациясы №3 мұнай өндіру цехының және орталық инженерлік-технологиялық қызметінің (ОИТҚ) жұмысымен танысты. №3 МӨЦ өткен жылы ұңғымалар қорының кеңеюіне, өндірістік көрсеткіштерді орындау қажеттілігіне және мұнайшылардың еңбек жағдайларын жақсарту бойынша жүргізіліп жатқан жұмыстар аясында ашылды. Өңір басшысы компанияда барлық бағыттар бойынша жүргізіліп жатқан жұмыстардың нәтижелілігін атап өтіп, еңбек ұжымына табыс тіледі.