Қаражанбастық қос мұнайшы төрт дүркін Азия чемпионы атанды

«Қаражанбасмұнай» АҚ-ның қос жұмысшысы Азияның төрт дүркін чемпионы атанды. Кір тасын көтеруден 8 мемлекеттің 200-ден астам қатысушысы бақ сынаған байрақты бәсекеде №3 мұнай өндіру цехының операторы Нартай Алтыбаев пен технологиялық көлік департаментінің жүргізушісі Айдын Ахметов алтын медальға ие болды.
 
73 келі салмақ дәрежесінде жарысқа шыққан Нартай 10 минут ішінде кір тасын 181 рет көтерсе, 85 келіде сайысқа түскен Айдын 122 рет көтеріп, шашасына шаң жұқтырмады. Сондай-ақ ел намысын қорғаған Қазақстан ардагерлер құрамасы командалық есепте алға шығып, чемпион кубогын иеленді.

«Еліміздің патриоты ретінде мұнай өндірісіне атсалысып, спортта да биік белесті бағындыру – біздің азаматтық борышымыз деп білеміз. Үздіксіз дайындық пен тұрақты жаттығу - осындай жеңіспен түйінделгеніне қуаныштымыз. Бізді қолдап, сенім білдірген әріптестеріміз бен компания басшылығына алғысымыз шексіз!»,- деді чемпиондар.

Өндіріс пен спортты қатар алып жүрген қос мұнайшы – Халықаралық дәрежедегі спорт шеберлері. Сондай-ақ олар бұған дейін Әлем чемпионы атағын үш рет абыроймен қорғады. Енді чемпиондар күзде Қытайда өтетін Әлемдік додаға дайындыққа кіріседі.