Қаражанбастықтар ардагерлерін құрметке бөледі

Компания құрметті демалыстағы зейнеткерлерге үнемі көңіл бөліп, әлеуметтік қолдау көрсетеді. Басшылық бұл жолы да ұлыстың ұлы күнімен қатар келген рамазан айында өмірін өндіріспен өрнектеген 500-ге жуық ардагердің басын қосты.

Алдымен ҚБМ басқармасы зейнеткерлерді мерекелермен құттықтап, алғысқа толы жылы лебізін жеткізді. Одан соң компанияның кешегісі мен қазіргі тынысы қамтылған бейнероликтер көрсетілді. Ардагерлер жүріп өткен жолынан тағылымды естеліктер айтып, жас буынға жігерлі сөздерін жеткізді. Қаражанбастың жаңа нұсқада өңделген әнұраны шырқалған сәтте аға буын қызметтегі жылдарына сапар шегіп, ерекше әсер алды.

«Біз талай қиындыққа мойымай, бойымыздағы ынта-жігер мен ауызбіршілік арқасында кездескен кедергілерді абыроймен еңсере алдық. Сүйікті кен орнымызды қазіргі мұнайшылар буыны одан әрі дамытады деп сенеміз. Оларға компания тұрақтылығын сақтау және өркендету үшін зор жауапкершілік жүктелген. Аға буынды ардақтап, көрсетіп жатқан құрмет пен қамқорлығыңызға рақмет», – деп атап өтті ардагерлер.

Зейнеткерлерге құрмет ретінде мерекелік себеттер табыс етілді. Іс-шара өлке өнерпаздарының шағын концертіне ұласты.