10 наурыз 2023, 10:25 1074

Қаражанбастың мұнайшы қыздары ой жарыстырды

8 Наурыз – Халықаралық әйелдер күніне орай Қаражанбаста І ауысым жұмысшылары арасында «Не? Қайда? Қашан?» зияткерлік сайысы ұйымдастырылды. Бұл жолы білгірлер тобы орындығына әртүрлі цехтардың нәзік жандыларынан құралған мұнайшы қыздар командасы жайғасты.

Сайыс ережесіне сәйкес, қатысушыларға ұлттық құндылықтар, қыздардың өмір салты мен қолданыстағы бұйымдарына, ас үй мен қызметке қатысты 13 сұрақ қойылды. Олардың арасында миға шабуыл жасайтын бейне сұрақтар да бар. Ойыншылар әр сұраққа 1 минут ішінде жауап беруі тиіс. Әр дұрыс жауапқа бір ұпай беріледі. Егер білгірлер сауалға дұрыс жауап бере алмаса, ұпай залдағы көрермендер қоржынына түседі.

«Мерекелік ойын өте қызықты әрі тартысты болды. Жұмыстан тыс ұйымдастырылатын осындай шаралар қызметкерлердің білім көкжиегін одан әрі кеңіте түседі. Мұнайшы қыздар бірлесіп, бар білгенін ортаға салып, сұрақтарға дұрыс жауап беруге тырыстық. Халықаралық әйелдер күнінде ұйымдастырылған сайыс біз үшін ерекше сый болды», – деді мұнайшы арулар.

Сұлулық пен кәсібилікті қос қанат еткен қаражанбастық қыздар қойылған сұрақтарға тез әрі нақты жауап берді. Осылайша олар көрерменден басым түсіп, жеңімпаз атанды. Білім мен тәжірибе арқасында топ жарған аруларға гүл шоқтары мен естелік сыйлықтар табыс етілді.