31 қаңтар 2022, 08:15 1865

Картоп экспортына тыйым: 40 вагон көкөніс жөнелтушілер ұсталды

Жүк жөнелтушілер Түркістан облысының Сарыағаш станциясында Өзбекстанға жеткізілетін 40 вагон картоппен ұсталды.

Вагондарды Павлодар облысының жүк жөнелтушілерімен 2022 жылғы 11 қаңтар мен 20 қаңтар аралығында тиелген. Барлық вагондарға уәкілетті органдар: Ауыл шаруашылығы министрлігі және жөнелтуші кеден органдары берген фитосанитариялық және карантиндік сертификаттар мен экспорттық кедендік декларациялары бар.

Алайда, 2022 жылғы 10 қаңтарда ауыл шаруашылығы мен қаржы министрліктерінің Қазақстан аумағынан жекелеген тауарларды әкетуге тыйым салуды енгізу туралы НР-5,21 бұйрығы қабылданған болатын. Құжат жарияланған күнінен бастап 10 күнтізбелік күн өткен соң, яғни 2022 жылғы 22 қаңтарда күшіне енді.⠀

Осы жағдай бойынша «ҚТЖ-Жүк тасымалы» ЖШС ағымдағы жылдың 25 қаңтарында ауыл шаруашылығы министрлігі мен ҚР Қаржы министрлігі Мемлекеттік кірістер комитетінің атына сауал жолдады.