Каспий теңізінің түбімен алғашқы суасты байланыс желісі тартылады

«Самұрық-Қазына» қорының портфельдік компаниясы – «Қазақтелеком» АҚ мен «AzerTelecom Int.» компаниясы бірлесіп, Каспий теңізінің түбімен суасты талшықты-оптикалық байланыс желісін салу бойынша ауқымды жобаны іске асырып жатыр.

Ақтау (Қазақстан) – Сумгайыт (Әзербайжан) бағыты бойынша желінің ұзындығы - шамамен 380 шақырым. Жоба аясында теңізде зерттеулер жүргізіледі, суасты кабелі дайындалып, Каспий теңізіне жеткізіледі және бекітілген бағыт бойынша төселеді. Жаңа суасты талшықты-оптикалық байланыс желісі деректердің сенімді жіберілуін қамтамасыз етеді.

Жоба цифрлық инфрақұрылымды дамытуға, оның ішінде деректерді өңдеу орталықтарын және ірі технологиялық BigTech компанияларды өңірге тарту мүмкіндігіне жол ашады.

Айта кету керек, бұл Каспий теңізінде тарихтағы алғашқы суасты байланыс желісі болмақ.