«Қазақстан ұлттық пантеоны» кітабының тұсауы кесілді

Қазақстан мұнайының 125 жылдығына орай «ҚазМұнайГаз» ҰК АҚ әлеуметтік жауапкершілігі аясындағы қолдауымен жарыққа шыққан «Қазақстан ұлттық пантеоны» атты тарихи ұлы тұлғаларды дәріптеуге арналған бірегей басылым оқырман назарына ұсынылды.

— Басылым – еліміздің терең тарихында халқымыздың даңқын шығарып, ұлтына шексіз қызмет еткен ең әйгілі 125 тұлғаның артында қалдырған өмірлік өнегесі мен өсиетін жүректе сақтап, ұлтқа қызмет ету үлгісін өскелең ұрпақтың санасына сіңіруді мақсат етеді. Мұнай – еліміздің бір байлығы болса, тарихи тұлғаларымыз – барша қазақтың бас байлығы. Осындай халық әлеуетінің өзара байланысына ерекше көңіл бөлген «ҚазМұнайГаз» келешек ұрпаққа үлгі-насихат ретінде аталмыш кітапты шығаруды әлеуметтік міндеті деп біледі, – деп атап өтті жоба жетекшісі Жақсыбек Құлекеев.

Қазақ және орыс тілдерінде басылған тарихи-танымдық кітап ең алдымен ҚазМұнайГаз кәсіпорындары орналасқан өңірлерге, еліміздің жоғары оқу орындары мен кітапханалары және мұрағаттарына сыйға берілді.