Қазақстанда әр ұжым бақытты болу керек

Бүгін Нұр-Сұлтанда басталған XIV "Бақыт ұйымы" халықаралық HR-конференциясының негізгі ойы осы болуда деп хабарлайды SKnews.kz тілшісі. Атап өтерлік жайт, ауқымды шараны ұйымдастырушы "Самұрық-Қазына" корпоративтік университетіне биыл 10 жыл толып отыр.

Конференцияның ашылу барысында "Самұрық-Қазына" қорының Басқарма төрағасы Ахметжан Есімовтің бейнежолдауы тыңдалып, Басқарма төрағасының орынбасары Әлішер Пірметов пен Қазақстанның Тұңғыш ғарышкері Тоқтар Әубәкіров отбасы мен жұмыстағы бақыт жайлы түсінігін жеткізді. Халық қаһарманының тұшымды пікірін алдағы SK News нөмірінен оқи аласыздар.

Сонымен, Корпоративтік университет өкілдерінің айтуынша, "Бақыт ұйымы" тақырыбы кездейсоқ таңдалған жоқ. Себебі, ұжымдағы ахуал адамның көңіл-күйімен қатар, өндіріс орнының еңбек өнімділігіне әсер етеді. Сондықтан, үздік халықаралық HR-сарапшылар қызметкерлерді басқару ісіндегі соңғы трендтер жөнінде пікір алмасуға арнайы шақырылған. Олар екі күн бойы төл тәжірибелерімен бөлісіп, қазақстандық жұмыс берушілерге өз ұсыныстарын жасамақ.

Соңғы деректерден келтіре кетсек, бақытты қызметкерлердің еңбек өнімділігі 12%, тиімділігі 31% жоғары екен және олардың шығармашылық шешім табуда 3 есе белсенді болатыны, 30% аз сырқаттанатындығы анықталған.

Талқылауларға білікті сарапшылармен қатар, "Жас Өркен" бағдарламасының жас мамандары қатысуда. Осылайша, аға буынның білігі жастардың әлеуетін дамытуға бағытталуда.

Екінші күні, 26 сәуірде, конференцияның хэдлайнері Дэйв Логан сөз сөйлемек. Ол PhD, "Нью-Йорк Таймс" газетінің нұсқасы бойынша "Көшбасшы және тайпа: корпоративтік мәдениеттің бес деңгейі" №1 бестселлерінің авторы, "The Wall Street Journal" және "USA Today" басылымдарының нұсқасы бойынша "Тиімділіктің үш заңы" бестселлерінің авторы, "University of Southern California" көшбасшылық және менеджмент ұстазы.