Қазақстанда Stadler заманауи вагондары жасалады

Бұл жолы «DB Engineering&Consulting» ұсыныстары негізінде халықаралық байқаудың нәтижесі бойынша швейцариялық «StadlerBussnang AG» компаниясы топ жарып, Қазақстанда жолаушылар вагондарын шығару жобасы бойынша серіктес деп танылып отыр.

Осы мәселеге қатысты Қазақстан Республикасының Индустрия және инфрақұрылымдық даму министрлігі «Қазақстан Темір Жолы» ҰК» АҚ-мен бірлесе отырып, «Stadler» компаниясымен ынтымақтастық мәселелерін талқылады. «Stadler» компаниясына келсек, ол жылжымалы құрам шығарумен 80 жылдан астам уақыт айналысады.

Stadler вагондарының артықшылықтары қандай? 

• Вагондарды пайдалану мерзімі 40 жылды құрайды
• Еуропалық сапа стандартына сай;
• Заманауи дизайн, оқшаулау деңгейі және жаңа технологиялар трансферті.

Мамандар, әсіресе, вагондардың отын багы көлемінің сыйымдылығы басқа өндірушілермен салыстырғанда жолаушылар пойызының құрамына автономды режимде әлдеқайда ұзақ жұмыс істеуге мүмкіндік беретінін айтып отыр. Жалпы алғанда, вагондардың техникалық сипаттамасы оларды жөндеудің жоспарлы түрлеріне ұзақ уақыт жұмсамай, яғни ағытпай-ақ жөндеу жүргізе беруге болатынын көрсетіп отыр. Құрамдар өз кезегінде үздіксіз тасымалдау процесін қамтамасыз етеді деген сөз.

Атап өтерлігі, елімізде швейцариялық вагондар өндірісін ұйымдастыру үшін жергілікті «Тұлпар» зауыты қызметкерлерінің Stadler зауыттарында біліктілігін шыңдауы жоспарланған. Бүгінгі таңда «ҚТЖ» ұлттық компаниясы «Самұрық-Қазына» акционерлік қоғамының қатысуымен қаржыландыру мәселесін пысықтап, валюталық тәуекелдерді азайту бойынша келіссөздер жүргізіп жатыр.