Қазақстанда Ұлттық құрылтай құрылды

Мемлекет басшысы Қасым-Жомарт Тоқаевтың жарлығымен Қазақстанда президент жанындағы Ұлттық құрылтай құрылды. Ол президент жанындағы консультативтік-кеңесші орган болып саналады, деп хабарлады Ақорда сайты. 

Жарлыққа сәйкес, Ұлттық құрылтай төрағадан, оның екі орынбасарынан, мүшелерден және хатшыдан тұрады. Төраға – Қазақстан президенті. 

Қазақстан Республикасының мемлекеттік кеңесшісі Ұлттық құрылтай төрағасының орынбасары болып табылады. Сондай-ақ, Ұлттық құрылтайдың құрамы белгілі мемлекет және қоғам қайраткерлерінің, саяси партиялар, үкіметтік емес сектор, бизнес-қауымдастықтар, сарапшылар қоғамдастығы және облыстардың, республикалық маңызы бар қалалардың, астананың қоғамдық кеңестері өкілдерінің қатарынан жасақталады. Ұлттық құрылтайдың құрамы кезең-кезеңмен, оның мүшелеріне ротация жүргізу тәртібімен жаңартылып тұрады.

Ал Ұлттық құрылтайдың жұмыс органы Ақпарат және қоғамдық даму министрлігі болады.