Қазақтелеком 1600 ауылды интернетке қосу жұмысын бастады

Жиын барысында «Қазақтелеком» акционерлік қоғамы өкілдері 2021 жылы атқарылған жұмыстар бойынша есеп берді. Болат Жәмішев төрағалық еткен «Самұрық-Қазына» Ұлттық әл-ауқат қорының Қоғамдық кеңесі «Қазақтелекомның» өткен жылғы қызметі бойынша есебін тыңдады.

Бүгінгі таңда байланыс операторы 1,8 миллионнан астам абонентті кең жолақты интернетпен қамтып, 15 млн-ға жуық тұтынушыға мобильді байланыс қызметін ұсынып отыр. 6 406 елді мекенді интернетпен қамтамасыз еттік деген Қуанышбек Есекеев биыл қала маңындағы елдімекендерге интернет тартылатынын жеткізді.

«Қазіргі таңда Қазақтелеком тобының мақсаты – клиенттердің сенімінен шығып, қажетін қанағаттандыру. Қала маңындағы елдімекендерге талшықты-оптикалық желіні тарту да оңай емес. Дегенмен биыл Нұр-Сұлтан, Алматы, Шымкент қалалары жанындағы елдімекендерге жаңа технологияны қолданып, интернет қосқалы жатырмыз», – деді «Қазақтелеком» АҚ басқарма төрағасы Қуанышбек Есекеев.

Ірі байланыс операторы кеңесте сандарды сөйлетіп, деректерді бүкпесіз жайып салды. Дивиденттер мен кіріс шығысты көрсетті. Былтырғы жылы 97,4 млрд таза пайдамен шыққан Қазақтелеком, адами капиталды дамытуға да басымдық беретінін алға тартты. Компанияда қазір 22 мыңнан астам қызметкер жұмыс істейді. Ұлттық оператор биыл «Қызметкерлерді әлеуметтік қорғау жылы» деп жариялап, мамандардың дамуы мен әлеуметтік жағдайына баса ден қоятындарын жеткізді.

«Келесі айда Нұр-Сұлтан мен Алматыда біздің қызметкерлердің балаларына «IT және робот техникасы» лагерін ашып жатырмыз. Келешекте аймақтағы жұмыскерлердің балаларына жоғары және орта білім оқу орындарына түсуге көмек беру бағдарламасын және сол секілді әлеуметтік шараларды қабылдап жатырмыз», – деді «Қазақтелеком» АҚ персонал бойынша басқарушы директоры Берік Битабаров.

Компанияның тұғырлы тағы бір міндеті – тұтынушылар үшін қолайлы жағдай жасап, байланыспен қамту. Осы орайда 1600 ауылды кең жолақты желімен қамтып, осы жерде тұратын 300 мыңға жуық халықты байланыс аясына шығару.