«Қазақтелеком» ауылдарды жылдам интернетке қосуды жалғастыруда

Қазақстанның ең ірі байланыс операторы ауылдарда желіні дамытуды жалғастыруда. «Қазақтелеком» Батыс Қазақстан облысында тағы бір базалық станция салып, осының арқасында Орал қаласынан 320 км жердегі 1200-ге жуық тұрғыны бар ауыл енді ұдайы «желі аясында» болады.

Қарақамыс – жыл басынан бері БҚО-да жылдамдығы жоғары интернетке қосылған бесінші ауыл. «Қазақтелеком» ауылда «радиокөпір» технологиясы бойынша желілер салды. Бұның сапасы EVDO технологиясына қарағанда телекоммуникация қызметін мүлдем басқаша көрсетеді. Ауыл тұрғындары бұл технологиядағы интернетті 12 жылдан бері пайдаланып келген. Қазір тұрғындар барлық заманауи телекоммуникация қызметтерін белсенді пайдалануда: онлайн оқу, жұмыс, бейнеқоңырау және тағы басқа.

«Радиокөпір» технологиясы арқылы желілік құрылыс жобасына қосылатын ауылдар тізбесі мынадай критерийлер бойынша қалыптасады: облыс орталығынан, қаладан шалғай орналасқан, білім және медицина ұйымы болуы тиіс, халық саны да ескеріледі», – деді «Қазақтелеком» АҚ Бөлшек бизнес дивизионының аймақтық қызмет көрсету және сату менеджері Бақытжан Ниязов.

Қарақамыстықтардың негізгі кәсібі – мал шаруашылығы. Ауылда 26 шаруа қожалығы бар: ірі қара, ұсақ мал ұстайды. Соның бірінің басшысы Амангелді Мырзағали интернеттің арқасында салық есептерін тапсыру әлдеқайда жеңілдегенін, ай сайын орталыққа сабылудың қажеті жоқ екенін айтады. 55 жастағы кәсіпкер гаджеттер арқылы құжаттарды мемлекеттік органдарға жібереді.

«Қазір интернет арқылы сиырға қажетті барлық ветеринария препараттарына тапсырыс бере аламын. Интернет бізге қаншалықты қажет екенін енді түсінген шығарсыз? Ол бізге ғана емес, мектептерге, ауруханаларға да керек. Осындай мүмкіндік берген «Қазақтелекомға» рахмет», – деді Амангелді аға.

Ауылда сонымен қатар екі мектеп, екі Мәдениет үйі, балабақша, екі кітапхана, дәрігерлік амбулатория, фельдшерлік пункт бар. Ауыл әкімі Самғат Зейнуллиннің айтуынша, базалық станция тұрғындар үшін жаңа мүмкіндік ашты.

«Бұрын ауылда интернет жылдамдығы өте төмен еді. Енді тұрғындар мемлекеттік қызметті онлайн алып, оқып, жақындарымен байланыса алады», – дейді Самғат Зейнуллин.

Жыл соңына дейін «Қазақтелеком» БҚО-да тағы үш ауылға – Қоскөл, Ақоба және Қособада базалық станцияларды іске қосуды жоспарлауда. Ал ауылға сымсыз желіні енгізу компанияның 2018-2020 жылдары шет аймақтарда талшықты-оптикалы байланыс желілерін салу жобасын жүзеге асырған соң мүмкін болды.