Қазатомөнеркәсіп Ядролық физика институтымен ынтымақтастықты кеңейтуде

Атом энергиясын бейбіт мақсатта пайдалану саласындағы Қазақстандағы жалғыз ғылыми-зерттеу ұйымы саналатын Ядролық физика институтында ғылыми зерттеулер мен тәжірибелік-конструкторлық жұмыстардың толық циклі, атап айтқанда іргелі, қолданбалы зерттеулер жүргізіліп, технологиялар мен өндірістер әзірленеді. ЯФИ базасында Қазақстанда іргелі зерттеулер, реакторішілік материалтану сынақтары, нейтрондық-активациялық талдау жүргізілетін, сондай-ақ өнеркәсіп үшін медициналық радиоизотоптар мен гамма-көздер өндірілетін жалғыз ВВР-К стационарлық ғылыми-зерттеу атом реакторы жұмыс істеп тұр.

Сапар барысында делегацияға радиоактивті материалдармен қауіпсіз жағдайда жұмыс істеуге мүмкіндік беретін қашықтан басқарылатын манипуляторлармен жабдықталған «ыстық камералардың» жұмысы таныстырылды. Қонақтарға қатерлі ісік ауруларын диагностикалауға және емдеуге арналған радиофармпрепараттар өндірісі көрсетілді.

Сонымен қатар, делегация радиоэкологиялық мониторинг саласындағы жетекші орталықтардың бірі болып табылатын ЯФИ кешенді экологиялық зерттеулер орталығына барды. Қонақтарға радионуклидтік құрам мен сирек жер элементтерін талдаудың жабдықтары мен әдістері ұсынылды.

Кездесу барысында Қазатомөнеркәсіп пен Ядролық физика институтының өкілдері атом саласын да, сирек және сирек кездесетін жер металдарының бағыттарын да қамтитын бірлескен ғылыми-зерттеу жобаларының перспективаларын талқылады. Тараптар инновациялық технологияларды дамытуға және ғылыми базаны нығайтуға бағытталған бірлескен бастамаларды іске асыруға қызығушылық білдірді.

«Біз Ядролық физика институтымен одан әрі ынтымақтастықтың үлкен мүмкіндіктерін көріп отырмыз. Бірлескен зерттеулер мен әзірлемелер біздің позициямызды едәуір күшейтіп, атом өнеркәсібіне озық технологияларды енгізуге ықпал етуі мүмкін. Бұл серіктестік сонымен қатар біздің компаниямыздың дамуына да, еліміздің ғылыми әлеуетін нығайтуға да ықпал ететін білім мен тәжірибе алмасу үшін платформа жасайды», - деді Қазатомөнеркәсіптің Басқарма төрағасы Мейіржан Юсупов.

Ядролық физика институтының бас директоры Саябек Сахиев ЯФИ бейбіт атомды пайдалану саласындағы технологияларды белсенді енгізіп, қолданатынын атап өтті. Институт отандық радиофармацевтикалық препараттардың шамамен 75% өндіріп, оларды еліміздің медициналық мекемелеріне жеткізіп береді. Осы жылдың маусым айынан бастап АЭХА-мен жасалған шарт шеңберінде Қырғызстанға молибден-99/технеций-99 генераторларын жеткізуге кірісті. Сонымен қатар, институт өнеркәсіптік мақсаттағы кобальт-57 изотопын өндіріп, оны Ресей, Германия, АҚШ және Францияға жеткізеді, ал Түркияға жеткізілімдерді кеңейту жоспарланып отыр.

Қазатомөнеркәсіп ядролық технологиялар саласындағы өз мүмкіндіктерін арттыруға және ғылыми зерттеулерде ілгерілеуге ұмтыла отырып, жетекші ғылыми-зерттеу институттарымен әріптестік қатынастарды белсенді дамытуды жалғастырып келеді, мұның бәрі Компанияның инновациялар мен тұрақты дамуға бейілділігін дәлелдейді.