ҚазМұнайГаз және Baker Hughes технологиялық серіктестікті нығайтуға ниетті

Абу Даби қаласында (БАӘ) «ҚазМұнайГаз» ҰК АҚ (ҚМГ) Басқарма төрағасы Асхат Хасенов «Baker Hughes» (BH) компаниясының президенті Лоренцо Симонеллимен кездесті. Әңгімелесу барысында технологиялар, қосалқы бөлшектер өндірісі, мұнай сервис қызметтерін локализациялау және қазақстандық мамандарды даярлау саласындағы ынтымақтастықты кеңейту перспективалары қаралды.

А.Хасенов атап өткендей, ҚазМұнайГаздың негізгі басымдықтарының бірі — жаңа өндірістерді ашу, елішілік құндылықты дамыту және қызмет көрсетумен, жабдықтарды жөндеумен және олардың техникалық диагностикасымен айналысатын отандық компаниялардың мүмкіндіктерін кеңейту.

Осыған байланысты ҚМГ BH компаниясына тауарларды локализациялау, сондай-ақ іске асырылып жатқан жобалар аясында Қазақстанда жөндеу жұмыстарын жүргізуді ұйымдастыруға ден қоюды ұсынды.

Анықтама: Baker Hughes (бұрынғы атауы General Electric) — америкалық трансұлттық мұнай сервистік корпорациясы, штаб-пәтері Хьюстон қаласында (АҚШ) орналасқан. 120-дан астам елде өкілдігі бар. Baker Hughes Қазақстанда 2000-шы жылдардың басынан бері Теңіз, Қашаған және Қарашығанақ кен орындарына сервистік қызмет көрсетеді және жабдық жеткізеді. Атап айтқанда, 2024 жылы компания Теңіз кен орнындағы кеңейту жобасын табысты іске асыруға үлес қосты.