ҚазМұнайГаз бен SOCAR бірлесе жұмыс істейді

"ҚазМұнайГаз" Ұлттық компаниясы» АҚ Басқарма төрағасы Алик Айдарбаев Баку қаласында Әзірбайжанның "SOCAR" мұнай-газ компаниясының президенті Ровнаг Абдуллаевпен кездесті. Сондай-ақ, Бакудегі қазақстандық делегацияның құрамында "ҚМГ" ҰК" АҚ Басқарма төрағасының барлау, өндіру және мұнай сервисі жөніндегі орынбасары Құрманғазы Есқазиев, "Қазтрансойл" АҚ бас директоры Димаш Досанов, «Қазақтеңізкөлікфлоты» Ұлттық теңіз кеме қатынасы компаниясы» ЖШС бас директоры Марат Орманов болды. Сапар барысында мұнай-газ саласының барлық бағытындағы ынтымақтастық көкжиегі талқыланды деп хабарлайды қазақстандық Ұлттық компанияның баспасөз қызметі. 

Меморандум компаниялар арасындағы ынтымақтастық мүмкіндіктерін, соның ішінде – Каспийде геологиялық барлау жұмыстарын жүргізу саласындағы, атап айтқанда көмірсутек шикізатын барлау бойынша геологиялық-геофизикалық материалдарды бірлесіп зерттеу, сондай-ақ мұнай және мұнай өнімдерінің логистикасы, трейдингі бағыттарын көздейді. Уағдаластықта ынтымақтастықтың бірінші нақты жобасы ретінде ҚазМұнайГазға тиесілі суда жүзетін «Сәтті» бұрғылау қондырғысын Бакуге тасымалдау және оның кейінгі жаңғыртуы қарастырылған. Қондырғы Каспий теңізінің әзірбайжандық секторындағы SOCAR жобаларында бұрғылау жұмыстары кезінде пайдаланылады деп жоспарлануда.

Сонымен қатар, кездесу аясында SOCAR маркетинг және экономикалық операциялар басқармасы және «Қазақтеңізкөлікфлоты» ҰТКҚК» ЖШС арасында көмірсутекті тасымалдау саласындағы  ынтымақтастық жөнінде ниет білдіру туралы хаттамаға қол қойылған.