ҚазМұнайГаз мердігер мекемелерді құрамына қосу мәселесіне жауап берді

«Былтыр Маңғыстау облысындағы кен орындарында қызмет көрсететін бірнеше мердігер ұйымның жұмысшылары ұлттық компанияның штатына қабылдау туралы талап қойғаны рас. Бұл талапты орындау мүмкін емес екенін бірнеше рет айтқан болатынмын. Бұл, кем дегенде, ҚазМұнайГаздың еншілес мекемелеріне жұмысқа орналасуға кезекте тұрған өңірдегі жұмыссыз тұрғындарға қатысты әділетсіз әрекет болар еді», - деп атап өтті М.Мырзағалиев ҚМГ баспасөз қызметіне берген сұхбатында.

Дегенмен, ҚМГ басшысы ұлттық компания мердігер мекемелер жұмысшыларының еңбек жағдайын жақсарту мәселесіне қатысты талаптарды орындаудан бас тартпайтынын нақтылап өтті.

«Бұған дейін де жұмысшылардың талабын қолдап, осындай ұйымдардың біріне үш жыл ішінде 200-ден астам техниканы жаңартуға көмектесуге келістік. Бұл компания үшін айтарлықтай сома, десе де осындай шешімге келдік», - деді ол.

Еске сала кетсек, Маңғыстау облысында 2023 жылы 11 желтоқсанда «West Oil Software» ЖШС-нің 400-ден астам жүргізушісі талап қойып, жұмысын тоқтатқан болатын. Наразы топ өздерін «ҚазМұнайГаз» ҰК құрамына қосу, жалақыны ҚМГ еңбекақы төлеу жүйесімен теңестіру, материалдық-техникалық базаны жаңарту сынды бірқатар ұсынысты алға тартқаны жария болды. Кейін жүзден аса жұмысшы өз қызметіне оралған.