ҚазМұнайГаз теңіз суын тұщытатын зауыт құрылысын жоспарға сай аяқтайды

Аталған жоба Президент тапсырмасына сай «ҚазМұнайГаз» ҰК АҚ қаржысына салынып жатыр. Жаңаөзен халқының ауыз суға деген қажеттілігін толық қамтамасыз етуге мүмкіндік беретін жаңа зауыт тәулігіне 50 мың текше метр су шығаратын болады.

Су тұщыту зауытының өндірістік нысандарымен инженерлік инфраструктура құрылысы қатар жүріп жатыр.

Зауытты инженерлік желілерімен қамтамасыз ету мақсатында Жаңаөзен қаласына дейін тұщытылған суды жеткізетін 200 км (екі тармақ) су құбырының 150 километрге жуығы монтаждалып біткен.

Зауытты электр желісімен қамтамасыз ету үшін жоғары кернеулі электр желісіне арналған бағанның 90%-ға жуығы орнатылды. Оған қоса, 40 км автожол құрылысы, 40 км газ құбырын тарту жұмыстары да жүріп жатыр.