Қазпошта басшысы Ақпарат министрінің қабылдауында болды

«Қазпошта» АҚ басқарма төрағасы Әсел Жанасованы қабылдадым. Жақында өткен алғашқы өңірлік мерзімді басылымдар форумында көпшілікті мазалаған өзекті мәселелердің бірі – газет-журналдарды оқырманға жедел жеткізу болды. Осыған байланысты Әсел Жұбанышқызымен өзара пікір алмасып, қордаланған мәселелерді талқыға салдық», деп жазды Дархан Қыдырәлі.

Оның сөзінше, таяуда Мемлекет басшысы Қасым-Жомарт Тоқаев «Қазпошта» басшысын қабылдаған кезде аймақтардағы пошта операторы жұмысының әлеуметтік маңыздылығына назар аударып, аталған бағыттар жөніндегі стратегияны жүзеге асыру ісін жалғастыруды тапсырды.

«Министрлік өткен жылы «Қазпоштамен» баспа басылымдарын уақтылы жеткізу, жазылуға оңтайлы жағдай жасау туралы меморандумға қол қойып, тығыз қарым-қатынас жасауға уағдаласқан еді. Бірлескен жұмыстар өз нәтижесін береді деп сенеміз» деді Ақпарат және қоғамдық даму министрі.