ҚБМ басқармасы: Жоспардан ауытқуға жол берілмейді

«Қаражанбасмұнай» АҚ Басқармасы кен орнына жұмыс сапары аясында өндірістік объектілердегі ағымдағы жұмыс барысымен танысты. ҚБМ Бас директорының бірінші орынбасары Қуанышбай Нұрғалиев №1,№2,№3 мұнай өндіру цехтарының бірінші вахта ауысымындағы жұмыс топтарымен кездесіп, жағдайымен танысты.

Мұнайшылар компаниядағы интеграциядан кейінгі жаңа нысандар құрылысы және оларды іске қосу, инфрақұрылымды жаңғырту, жұмыс процесін оңтайландыру сияқты жағымды өзгерістерді атап өтті. Одан соң құрал-саймандардың техникалық жағдайы талқыланды. Басшылық келесі жылдан бастап аталған мәселелер кезең-кезеңімен шешілетінін айтты. Мұнайшылардың пікірі мен ұсыныстарын тыңдаған Басқарма оларды жылдық өндіру жоспарын орындау үшін жұмысты жандандыруға шақырды.

«Біз интеграциядан кейін компанияда жүзеге асып жатқан игі бастамаларды арттыра түсуіміз керек. Құралдардың сапасы, автокөліктерді жаңарту сияқты өзекті мәселелер жүйелі түрде шешіледі. Ең бастысы – нақты жоспармен жұмыс істеу және жылды жақсы өндірістік көрсеткіштермен қорытындылауға барынша күш салу», – деп атап өтті басшылық.

Одан соң ҚБМ Басқармасы сапар аясында ҚР Тәуелсіздігінің 30 жылдығына орай мәдени-демалыс орталығында ұйымдастырылған салтанатты шараға қатысты. Алдымен еңбек ұжымын айтулы күнмен құттықтаған басшылық, саланың дамуына елеулі үлес қосқан жұмысшыларға марапаттар табыс етті. І вахта ауысымының 20-ға жуық мұнайшысы Энергетика министрлігінің медальдарымен, мерейтойлық медальдармен, «ҚазМұнайГаз» ҰК» АҚ Құрмет грамоталарымен және ҚБМ алғыс хаттарымен марапатталды.

«Бүгін мен ел Президенті атынан «ҚР Тәуелсіздігіне 30 жыл» естелік медалін алдым. Бұл мен үшін үлкен қуаныш. Өйткені Қаражанбаста 15 жылдан астам уақыттан бері жұмыс істеймін. Еңбек жолымды электрик болып бастап, мансап сатысымен биікке өрледім. Бұл менің ғана емес, бүкіл ұжымның марапаты. Баршаңызды мерекемен құттықтаймын!» – деді электр цехының аға инженер-энергетигі.

Мұнайшыларға берілген марапаттар оларды жетістікке ынталандырады. Ал ҚБМ Басқармасының бірінші вахта ауысымына сапарлары жұмыс кестесіне сәйкес жалғасады.