ҚБМ басқармасы жұмыс барысын тексерді

«Қаражанбасмұнай» АҚ Басқармасы кен орнына жұмыс сапары аясында қабат суын тұшыту зауытының құрылыс алаңында болды. ҚБМ Бас директоры Ли Тецян және Бірінші орынбасар Қуанышбай Нұрғалиев өткен кеңейтілген отырыста берілген тапсырмаларды орындау аясында атқарылған жұмыстарды тексерді.

Құрылыс аумағында инвестор, мердігерлер және өзге де жауапты тұлғалардың қатысуымен көшпелі кеңес өтті. ҚБМ басшылығы қалған жұмыстарды жеделдету, сапа стандарттарын сақтау және құрылыс материалдарымен қамтамасыз ету бойынша нақты тапсырмалар берді.

Одан соң Қуанышбай Нұрғалиев кеңес кезінен қалған тарихи ластанған жерлерді, атап айтқанда, мұнаймен ластанған жерлер, үш жер үсті және бір теңіз қоймасын қалпына келтіру жұмыстарының барысымен танысты.

Экология, геология және табиғи ресурстар министрлігі мен «ҚазМұнайГаз»ҰК» АҚ арасындағы меморандум аясында өткен жылдың соңынан бастап Қаражанбаста ластанған топырақты өңдеу арқылы жерді қалпына келтіру жұмыстары белсенді жүргізілуде.

Қазірдің өзінде 21 гектар жер тазартылды. Ластанған учаскелерді толығымен қайта өңдеу 2024 жылдың соңына дейін жоспарланып отыр. ҚБМ басшылығы мердігерлерге әр объект бойынша жұмыстарды белгіленген мерзімде орындауды тапсырды.