ҚБМ дефектоскопистері республикалық додада бақ сынады

Кәсіби стандарттарды қолдау, мамандар құзыретін дамытумен өндірістік объектілердегі қауіпсіздікті арттыруға бағытталған жарысқа ГОСТ ISO/IEC 17024 және ҚР СТ ISO9712 стандарттарына сәйкес визуалды-өлшеу және ультрадыбыстық бақылау әдістері бойынша I, II, III деңгейлі мамандар қатысты.

ҚБМ намысын дефектоскопия зертханасының магниттік және ультра-дыбыстық бақылау дефектоскопистері Қайрат Ізов, Елеусін Көшбаев пен Дәурен Айтмағамбетов қорғады.

Еңбек өтілі 3 жылға дейін, 3 және 5 жылдан жоғары үміткерлер алдымен тест тапсырып, жоғары ұпай жинаған қатысушылар келесі кезеңге шақырту алды. Екі күндік жарыста олар технологиялық жабдықтармен жұмыс істеу шеберлігін паш етіп, қысқа уақыт ішінде күрделі тапсырмаларды сапалы орындауға тырысты.

Мамандықтың маңыздылығы мен сапа стандарттарын арттыруға арналған байқау дефектоскопистер үшін ең алдымен тәжірибе алмасу алаңы болды.