ҚБМ: ІІ вахтаның спорттық жарыстары басталды

«Қаражанбасмұнай» АҚ-да алғашқы мұнай фонтанының атқылағанына 50 жыл толуына орай ІІ вахта жұмысшылары арасында корпоративтік спорттық сайыстар басталды. Ашылу салтанатында Бас директор Марат Елеусінов пен Өндірістік басқарма басшылығы мұнайшыларды жарыстың басталуымен құттықтап, командаларға сәттілік тіледі.

«Біздің ұжымда өндіріспен қатар әртүрлі бағыт бойынша мықты спортшылар өте көп. Мерейтой аясындағы жарыс ең үздіктерін анықтап беретініне сенеміз. Алда жоспарланған шараларда да белсенділік танытып, Қаражанбастың абыройын бірге асқақтатайық», - деді ҚБМ Басқармасы.

Тартысты дода шымылдығын волейбол турнирі ашты. Өндірістік цехтардан құралған 8 команда төреші ысқырығы естілген сәттен бастап үздік ойын көрсетіп, жеңіс тұғырынан көрінуге барын салды. Нәтижесінде №3 мұнай өндіру цехының жігіттері шашасына шаң жұқтырмай, жарыс жеңімпазы атанды.

Ал жасыл алаңдағы шағын футбол жарысына 10 команда қатысты. Олардың әрқайсысы аяқдоп бәсекесіне тыңғылықты дайындықпен келген. Матч кезінде жанкүйерлер өз командаларын қошеметпен қолдап, жеңіске жетуге жігер сыйлады. Дегенмен көп ішінен дараланып, бабы мен бағы қатар шапқан технологиялық көлік департаменті құрамасы І орынға лайық деп танылды.

ІІ вахта жұмысшыларының спорт сайыстары әлі де жалғасын табады. Мұнайшыларды физикалық күші мен ой жүйріктігін сынға салатын ұлттық ойындар арқан тарту, асық ату мен баскетбол, үстел теннисі, шахмат бәсекелері күтіп тұр.