Кен орындарын игеруші: «Қаражанбас қойнауы – қазынаға толы»

Қаражанбастың бай ресурстық базасын қалыптастыру мен дамыту, жаңа белестерді бағындыру жолында аянбай еңбек етіп келе жатқандардың бірі – игеру бөлімінің басшысы Владимир Турков. Сауатты басшының қатаң бақылауы арқасында жаңа аумақтар зерттеліп, терең барлау мүмкіндігі молайды.

Мұнайшы-геологтың отбасында дүниеге келгендіктен, оның жер қойнауы, тау жыныстары мен терең қазыналар әлеміне қызығуы заңды. Институтты бітіргеннен кейін «Гурьевнефтегазгеология» ӨБ-ның ұңғымаларды сынау бойынша Балықшы экспедициясында жұмыс істеп, Солтүстік Қотыртас, Үшмола және Кордуан кен орындарында ұңғымаларға гидродинамикалық зерттеулер жүргізді. Содан соң «Ақтөбенефтегазгеология» ӨБ ұңғымаларды сынау және бекіту жөніндегі экспедицияға ауыстырылды. Онда Кеңқияқ, Қожасай, Әлібек Мола, Синельниковская, Шығыс Ақжар, Қарауыл келді, Жаңатаң және тағы басқа кен орындарында шеберлігін шыңдады.

«Гидродинамикалық зерттеулерден бөлек мен карбонатты шөгінділерде тұз-қышқылдарға өңдеу жүргізу әдістемесін әзірлеумен айналыстым. Сондай-ақ колоннада және ашық оқпанда ұңғымаларды сынау кезінде технологиялық операцияларды жүргіздім. Қазақстанда алғаш болып «Қабаттағы бірқалыпты депрессия» авторлық әдістемесі бойынша 5600-6200 метр тереңдіктегі аса жоғары қабатты қысымдары бар ұңғымаларда горизонттарды сынақтан өткіздім», – деп өз естеліктерімен бөліседі әріптесіміз.

Владимир Турков өз шыңдалған кәсіби қызметін 1997 жылы «Қаражанбасмұнай»  компаниясында жалғастырды.

«Елестету қиын, бірақ 25 жылдан астам уақыт бойы Қаражанбас менің отбасымдай болып кетті. Осы уақыт ішінде біз ұжыммен бірге өндірістегі әртүрлі жағдайлардан тиімді жол тауып шыға білдік», – дейді ол.

Ширек ғасыр ішінде ол үзеңгілес геологтармен бірге тереңге бойлап, алдағы ондаған жылдарға жететін берік және бай негіз қалыптастырды. Өз ісіне адал мамандар арқасында бүгінде 59 миллион тонна қара алтын өндірілген Қаражанбастың бағындырар белесі әлі алда.

«Өмірімнің қандай оқиғалармен есте қалғанын кесіп айту қиын. Бәрі бірдей жадымызда жаттала бермейді ғой. Барлығын тізіп шықсақ, кітап жазуға жетеді десем артық айтпаған болармын. Біріншіден, мәліметтер базасында мұнай өндіру және 25 жыл бойы бұл жұмыс істеп тұрған 4468 ұңғыма туралы ақпарат жинақталған ресурстық мәліметтер базасы дайындалды. Компания ұжымымен бірге кен орнында жұмыс істей отырып, тәуліктік мұнай өндірудің рекордтық көрсеткішіне қол жеткізу үшін көп күш жұмсадық», – деп, кейіпкеріміз сөзін қорытындылады.

Жер қойнауын барлау үздігі компанияның қоғамдық өмірінде де белсенді. Жас әріптестеріне батылдығымен, қайсарлығымен үлгі ол, ҚБМ ардагерлері футбол құрамасында шабуылшы болып ойнайды. Жақында 60 жылдық мерейтойын атап өтетін Владимир Турковтың есімі ҚБМ тарихында талай тереңдікті бағындырып, компанияның қарыштап дамуына ерекше үлес қосқан маман ретінде алтын әріппен таңбаланады.