ҚХР шекарасында транзиттік декларацияларды беру процесі автоматтандырылады

Жобаны ҚР Қаржы министрлігінің Мемлекеттік кірістер комитеті (МКК) «Қазақстан темір жолы» ҰК» АҚ мен PSA International-Global DTC әлемдік порт операторының еншілес компаниясымен бірлесіп іске асыруда.

2023 жылдың 9 желтоқсанынан бастап пилоттық жоба Алтынкөл – Сарыағаш бағдары бойынша Өзбекстан бағытында іске қосылды. Ол бойынша Алтынкөл станциясында 109 транзиттік декларация автоматты режимде шығарылды және ресімделді, барлық декларациялар бойынша транзит Сарыағаш станциясында сәтті аяқталды.

Өткен жылдың 27 желтоқсанында платформа Достық – Брест Северный бағдары бойынша іске қосылды, 52 транзиттік декларация ресімделіп, оларды Беларусь Республикасының кеден қызметі электронды түрде алды және олар бойынша транзитті аяқтады.

Пилоттың алғашқы нәтижелері транзитті электронды декларациялау және кедендік шығару процесіне 30 минут ішінде қол жеткізу болды.

Пилот өнеркәсіптік пайдалануға енгізілгенге және транзитке тартылған ЕАЭО елдерінің жалпы шешімі қабылданғанға дейін жалғасатын болады.

Tez Сustoms платформасы алдын ала ақпаратты дайындауды, транзиттік декларацияларды автоматты тіркеуді және шығаруды қоса алғанда, кедендік транзитті қағазсыз ресімдеу процесін автоматтандыруды қамтамасыз етеді.

Бұл ретте МКК ақпараттық жүйесі контейнерлердің келуі мен кетуі туралы автоматты ақпарат алады, ал темір жол жүйесі – декларацияның шығарылуы және транзиттің аяқталуы туралы электрондық хабарлама алады, бұл қағаз декларацияларды ұсынбай жүкті одан әрі жөнелтуді жүзеге асыруға мүмкіндік береді.

Tez Customs–DTC-Digital Trade Сorridor платформасының модульдерінің бірі. DTC платформасы мультимодальды тасымалдаулар үшін жіксіз цифрлық құжат айналымын қамтамасыз ету және Транскаспий халықаралық көлік бағдарын (ТХКБ) дамытуды ынталандыру мақсатында әзірленген. Платформа ТХКБ елдерінің барлық қатысушылары – Қытай, Қазақстан, Әзірбайжан, Грузия және Түркия үшін құжат айналымын цифрландыруды қамтамасыз етеді.