ҚМГ серіктестерімен болашақ қазақстандық инженерлерді даярлауды жалғастыруда

Бағдарламаға Nazarbayev University, Қазақстан-Британ техникалық университеті, Satbayev University, Сафи Өтебаев атындағы Атырау мұнай және газ университеті, Қазақ бас сәулет-құрылыс академиясы және Yessenov University студенттері қатысуда. Оның ішінде 15 қатысушы – Атырау мұнай және газ университетінің студенттері.

Бағдарлама теориялық және практикалық екі кезеңнен тұрады. Алғашқы үш айда қатысушылар онлайн форматта білім алады, содан кейін Tecnicas Reunidas компаниясының Мадрид қаласындағы бас кеңсесінде тағылымдамадан өтеді. Болашақ инженерлер халықаралық EPC-жобаларды іске асыру қағидаттарын меңгеріп, компания мамандарының жетекшілігімен негізгі инженерлік бағыттар бойынша білім алады. Бағдарлама толықтай Tecnicas Reunidas компаниясының қаржыландыруымен жүзеге асырылады.

Бағдарламаның алғашқы легі өз тиімділігін көрсетті: 31 студент оқуын сәтті аяқтап, олардың 22-сі TR компаниясынан жұмысқа шақыру алды. Бүгінде жас мамандардың бір бөлігі Атыраудағы Силлено зауытының құрылыс жобасында еңбек етсе, қалғандары испаниялық компанияның Мадрид қаласындағы бас кеңсесінде жұмыс істейді. 

Бағдарлама «ҚазМұнайГаз» ұлттық компаниясы мен Атырау облысында салынып жатқан полиэтилен зауыты құрылысының EPC-мердігерлерінің бірі – Tecnicas Reunidas (TR) компаниясының бірлескен бастамасымен әзірленген. Төрт жыл ішінде халықаралық стандарттар бойынша практикалық тәжірибе жинақтап, Қазақстанның мұнай-газ химиясы саласының дамуына үлес қоса алатын 120-дан астам жас қазақстандық инженерді даярлау жоспарланып отыр.