ҚМГ спартакиадасы: Қаражанбаста тағы қос күміс

Жеңіс тұғырына көтеріліп, жүзден жүйрік атанғандар арасында «Қаражанбасмұнай» АҚ жұмысшылары да бар. Тоғызқұмалақ пен 100 метр қашықтыққа жүзу бойынша ҚБМ мұнайшылары қос күміс медальді қанжығаға байлады.

Тоғызқұмалақ ептілік пен дәлдік, әрі батыл шешім қабылдауды қажет ететін зияткерлік ойын. №3 мұнай өндіру цехның операторы Бернұр Ғабдірасылұлы ҚМГ спартакиадасында компания намысын қорғау үшін ерекше дайындалды. Жүлдегер атану жолында 7 кездесу өткізіп, ұшқыр ойлау мен тиімді әдістерді шебер үйлестірген Бернұр, қарсыластарының барқатарынан басым түсті. Қорытындыға сәйкес, ол күміс жүлдеге лайық деп танылды.

Мықты дайындық – жеңіске жеткізетін бірінші қадам. Бұл 100 метрге жүзуден сынға түскен Ғани Чалабаевтың басты ұраны. Аталмыш спорт түрі үшін әр секунд шешуші роль атқарады. Сондықтан Ғани, төреші ысқырығы естілгеннен бастап, үздік атану үшін барын салды. Нәтижесінде 100 метр қашықтықты 1 минут 10 секундта жүзіп өтіп, мәреге екінші болып жетті.

Өзге де спорт түрлерінен жарыстар әлі де жалғасып жатыр.