Главная Новости Қола мүсіндер - теміржол кәсіптерінің нышандары елордалық алаңды безендірді

02 тамыз 2024, 16:01 747

Қола мүсіндер - теміржол кәсіптерінің нышандары елордалық алаңды безендірді

«Қазақстан темір жолы» ұлттық компаниясы Көлік қызметкерлері күніне және Қазақстан темір жолының 120 жылдығына орай «Мәңгілік Ел» Салтанат қақпасы жанында орналасқан елордалық «Теміржолшылар алаңын» болат магистраль мамандықтарын бейнелейтін мүсіндер сериясымен безендірді.

Ашылу салтанаты сала ардагерлері мен «ҚТЖ» ҰК» АҚ басшылығы өкілдерінің қатысуымен өтті. Әрбір мүсін кез-келген кәсіптегі ең бастысы - еңбек адамы екенін паш етеді. Белгіленген композицияда жолсеріктің, машинистің және жолшының шағын архитектуралық формалары ұсынылған.

Сәулет пішіндерінің авторы - белгілі мүсінші, Мемлекеттік сыйлықтың лауреаты Мұрат Мансұров.

Көріністер теміржол магистралінің қуатты күшінің белгісі - ел экономикасының берік тірегі ретінде қоладан жасалғаны маңызды.

«Теміржолшылар алаңы» 2023 жылдың тамыз айында елорда тұрғындары мен қонақтарына Көлік қызметкерлері күніне орай «Қазақстан темір жолы» ұлттық компаниясы сыйға тартты. 1 га алаңда 300 жуық жапырақты ағаштар (үйеңкі, жөке, мойыл және басқалары), 3000 астам бұталар мен гүлдер отырғызылды.