Коммуникация ашық болса – мәселелер қордаланбайды

«Маңғыстаумұнайгаз» АҚ Бас директоры Дәулетжан Хасанов «Қаламқасмұнайгаз» өндірістік басқармасы цехтарының шеберлерімен кездесті.

Кездесуде компания басшысы қатысушыларға осы жылдың өндірістік және әлеуметтік-экономикалық көрсеткіштері туралы айтып, шеберлерді ашық диалогқа шақырды. Мұндай коммуникациялар мәселелерді бірлесіп анықтауға әрі шешуге, болашақта кәсіпорынның мақсаттары мен міндеттерін белгілеуге көмектесетінін атап өтті.

Қаламқас шеберлерін алаңдататын сұрақтардың басым бөлігі әлеуметтік-тұрмыстық жағдайлар, жаңа технологияларды енгізу, сапалы материалдарды сатып алуға қатысты. Кездесуде осы мәселелер ашық талқыланды.

Дәулетжан Хасанов қазіргі уақытта кенорындарындағы әлеуметтік-тұрмыстық жағдайларды жақсарту бойынша бес жылдық жоспар әзірленіп жатқанына тоқталды. Аталған жоспар аясында мұнайшылардың тұрмыстық үй-жайларын салу және жөндеу көзделеді.

Еске салсақ, 18 қарашада «Жетібаймұнайгаз» өндірістік басқармасының шеберлерімен дәл осындай кездесу ұйымдастырылды.

Кездесу соңында Дәулетжан Хасанов шеберлермен түйткілді мәселелерді тікелей талқылауға және кері байланыс алуға мүмкіндік беретін осындай қарым-қатынас форматының маңызды екенін айтып, болашақта кенорын қызметкерлерімен кездесулер жалғасатынын айтты.