ҚТЖ – 25: «Мерейтойлық старттар» бастау алды

Олар ұлттық теміржол компаниясының 25 жылдығына және салалық кәсіподақтың 30 жылдығына арналған. Спорттық мереке демалыс күндері апта сайын өткізіледі және 30 сәуірге дейін жалғасады.

Елордада орналасқан компанияның орталық аппаратының, филиалдарының және еншілес ұйымдарының қызметкерлері үшін мерейтойлық іс-шараны «ҚТЖ» ҰК» АҚ әлеуметтік саясат департаменті мен «Казпрофтранс» ҚБ бірлесіп ұйымдастырды.

Жарысқа барлық тілек білдірушілер қатыса алды. Ашылу рәсімі қарсаңында қатысушыларға жеребе тасталып, оның барысында әрқайсысы 10 адамнан тұратын үш құрама команда құрылды.

«Казпрофтранс өзінің 30 жылдығын сөзбен емес, нақты істермен атап өтуде. Мереке аясында жыл бойы еліміздің түрлі өңірлерінде мәдени-бұқаралық, имидждік және спорттық іс-шаралар жоспарланған», – деп атап өтті салалық кәсіподақ төрағасы Оразғали Ахметбаев.

Жарыс үш кезеңнен тұрады. Бірінші күні (ол өткен демалыс күндері өтті) "ҚТЖ" ҰК" АҚ орталық аппаратының қызметкерлері арасында үздіктер анықталды. Екінші кезеңде компания филиалдарының командалары, үшінші кезеңде-еншілес ұйымдар кездеседі. Өз кезеңдерінде бірінші орын алған құрамалар 30 Сәуірде финалда жүлделі орындарға таласады.