ҚТЖ 100 жас есім: модульдік оқыту жобасы

Жалпы осы бағдарлама аясында биыл барлығы 4 модульдік оқыту жоспарланған. Былтыр жылдың аяғында Қазақстан теміржолында қызмет ететін белсенді де қабілетті жастар арасынан іріктелген «Жүз жас есім» иегерлері алдағы үш жылда аталған бағдарлама шеңберінде оқытылатын болады.

Онлайн модульдік оқыту ашылуына осы 100 жас теміржолшы түгел және компания басқарма төрағасының корпоративтік мәселелер жөніндегі орынбасары Серік Әбденов, компанияның адами ресурстарды басқару департаментінің директоры Тамила Микулич, осы департаментінің HR бизнесәріптесі Ақмарал Байғабыловалар қатысты.

Серік Әбденовтің айтуынша, бұл шараны наурыз айында Алматы қаласында өткізу жоспарланған. Алайда елде жарияланған төтенше жағдайға байланысты оқыту шарасы кейінге қалдырылыпты.

Міне, енді онлайн форматта алғашқы модульдік оқытуды ашқан ол жастарға алдымен компанияның қазіргі таңда басымдық беретін бағыттарын айтып берді.

– Біз үшін қауіпсіз және қолайлы еңбек жағдайын жасау аса маңызды. Сондықтан өндірістік қауіпсіздік пен еңбек қорғау деңгейін арттыру үшін Басқарма төрағасының шешімімен «Қауіпсіздіктің іс әрекет диалогы», «Қауіпті тоқтат!», «Салдары жоқ оқиғалар» атты бағдарламалар іске қосылды. Соған қоса жұмысшыларды қауіпсіздік бағдарламалары бойынша белсенді оқыту қолға алынды. Былтыр 300 адам оқытылса, биыл 89 мың теміржол шыны оқыту көзделуде. Жыл басынан бері 67800 адам оқытылып болды, – деді Серік Әбденов.

Ал адами ресурстарды басқару департаментінің басшысы Тамила Микулич «ҚТЖ 100 жас есім» даму бағдарламасының таныстырылымын өткізді.

Ол бағдарлама мақсаты – компанияның нақты белгіленген осы жас қызметкерлерін үлгі ете отырып, компанияда мінез-құлық идеясы мен кәсібилік және белсенді бейілділікті дамыту екенін жеткізді.

Осы бағдарламаны жүзеге асыру нәтижесінде компанияда болашақ басқарушылардың резерві қалыптастырылып, компанияны трансформациялауды жүргізу үшін өзгерістер тетіктерін анықтау, компания мәдениеті мен нормалары, құндылықтары мен саясаты және стратегиясын трансляциялайтын жетекші мамандарды дайындау, жастардың табыстылығы арқылы компанияның имиджін көтеруге қол жеткізілмек.

ҚТЖ сынды алып компанияның үміті мен болашағы деп іріктелген жастар сан қырлы. Олардың қатарында, атап айтқанда ерекше қажыр-қайраты, білімі мен білігі, жаңашыл жобалары, өздерін өздері дамытудағы белсенді іс-әрекеті, қайырымдылық жобасы мен еріктілер ісін дамытудағы бастамаларымен көпке үлгі болған жастар жетерлік.

Соның ішінде қызылордалық Айдана Нұрмашқызы мен Еркебұлан Аяғановты, көкшетаулық Юлия Тё мен Аңсар Сансызбайды, Шымкенттен Ердос Ерланұлы, Серік Тлеумбетовті, Рахымжан Нұрмұрзаев пен Ақберен Әбдірахмановты, оралдық Дәуренбек Ишимовты, алматылық Диас Байғонысовты, атыраулық Артур Абдировты, ақтөбелік Руслан Жұмағалиевті, атбасарлық Әсем Куласбаеваны, екібастұздық Ержан Келдібаевты, сонымен қатар елордалық Ержан Жаналиев пен Кәмшат Тиштыкбаеваны ереше атай кеткен жөн.

Адами ресурстарды басқару департаментінің HR бизнес-әріптесі Ақмарал Байғабылова «ҚТЖ 2020 қайырымды іс» бағдарламасы бойынша теміржол жастарының өткен 5 ай ішінде атқарған игі істеріне тоқталды.

Жылдың басынан бері ерікті теміржолшылар аз қамтылған отбасыларға көмек көрсету бойынша 474 қайырымдылық шара, 122 экологиялық бағыттағы акциялар, төтенше жағдай кезіндегі 83 қайырымды іс, жасы ұлғайған адамдарға қатысты 1233 көмек, балаларға 78 көмек, әлеуметтік бағдарлама аясында 15 шара, донорлық бойынша 25 қайырымды іске қатысқан екен.

Бүгінгі шара – «ҚТЖ 100 жас есім» жас мамандарды дамыту бағдарламасы бойынша бірінші модульдік оқытудың ашылу рәсімі. Ал оқытудың өзі 25-29 мамыр аралығында өтеді.